Tilboð mánaðarins er leiklestrarröð þar sem eru fluttir æfðir leiklestrar af okkar skemmtilegasta bransafólki. Í hverjum mánuði bjóða listrænir stjórnendur, Anna María Tómasdóttir og Gígja Hilmarsdóttir, valinkunnu sviðslistafólki til að velja með sér leikrit til lestrar - nýtt verk, nýtt fólk, nýtt tilboð mánaðarins - alltaf brakandi ferskt. Leiklestrarnir eru einnig í samvinnu við Leikminjasafn, Sigríður Jónsdóttir sérfræðingur við safnið tekur þátt í umræðum eftir lesturinn og deilir sögulegum gögnum um fyrri sýningar með áhorfendum. Tilboð sem þú getur ekki hafnað!

Apríl Tilboð mánaðarins:   

Við ljúkum leiklestrarröðinni Tilboð mánaðarins í vetur með verki sem hittir beint í hjartastað! Engin önnur en Kristín Þóra Haraldsdóttir og Hilmar Guðjónsson lesa hið undurfagra, fyndna, sára og skemmtilega verk Óskar og bleikklædda konan, eftir franska rithöfundinn Éric‑Emmanuel Schmitt. Verkið hefur heillað áhorfendur víða og var meðal annars sett upp í Borgarleikhúsinu, í þýðingu Guðrúnar Vilmundardóttur þar sem Margrét Helga Jóhannsdóttir fór með öll hlutverkin. Sýningin fékk lof og hlýju fyrir einlægan húmor og djúpa lífsspeki.

Við fylgjum Óskari, tíu ára dreng sem á skamman tíma eftir ólifað en hefur meira innsæi en flestir fullorðnir og sambandi hans við Ömmu bleiku, sem mætir honum af hreinskilni og nennir að spjalla tæpitungulaust um lífið og tilveruna - það eina sem maður vill sem barn að einhver sjái mann og segi manni satt.

Mætið með tissjú, þetta verður svolítið sorglegt en líka fallegt.