Orgelsumar í Hallgrímskirkju

David Cassan orgel

St. Etienne de Mont, Paris, France

David Cassan er einn af fremstu ungu orgelleikurum sinnar kynslóðar og nýtur mikillar viðurkenningar á alþjóðavettvangi. Hann stundaði nám í orgelleik, tónsmíðum og spuna við Caen Conservatoire og við Conservatoire National Supérieur de Musique de Paris og Conservatoire National Supérieur de Musique de Lyon.

Hann heldur uppi annasömu tónleikahaldi sem einleikari og kemur fram með virtum hljómsveitum, þar á meðal Orchestre Philharmonique de Radio France, Orchestre de Paris, Orchestre National de Lyon og Orchestre National du Capitole de Toulouse, bæði í Frakklandi og víðs vegar um heim; í Þýskalandi, Englandi, Rússlandi, Kína, Ísrael, Eystrasaltslöndunum, Spáni, Íslandi, Tékklandi og víðar.

David Cassan hefur hlotið mikið lof gagnrýnenda. Hann hefur á valdi sínu víðfeðma og fjölbreytta efnisskrá með sérstaka áherslu á verk eftir Johann Sebastian Bach og frönsk orgelverk 19. og 20. aldarinnar. Hann er einnig virtur og skapandi spunaleikari og leikur reglulega undir þöglum kvikmyndum á píanó og orgel.

Cassan hefur unnið til fjölda verðlauna í alþjóðlegum orgelkeppnum, m.a. í Chartres (Frakklandi), St. Albans (Bretlandi) og Haarlem (Hollandi), auk verðlaunanna Grand Prix Jean-Louis Florentz frá Académie des Beaux-Arts. Þessar viðurkenningar hafa gert hann að einum mest áberandi orgelleikara sinnar kynslóðar.

David Cassan er einnig virtur kennari og heldur reglulega námskeið víða um heim (Sankti Pétursborg, Peking, Bern, Mílanó, Lausanne, Zagreb, Porto, París, Mallorca o.fl.). Hann kennir orgelleik við Conservatoire de Nancy og spuna við Conservatoire de Saint-Maur-des-Fossés og situr jafnframt í dómnefndum alþjóðlegra tónlistarkeppna.

Árið 2017 varð hann organisti við Oratoire du Louvre í París. Árið 2025 tók hann við sem annar aðalorganisti (co-titulaire) við stórorgel Église Saint-Étienne-du-Mont í París, í arfleifð sem tengd er franska tónskáldinu Maurice Duruflé.

Efnisskrá

Maurice Duruflé (1902–1986)
Prélude et fugue sur le nom d’Alain

Henri Dallier (1849–1934)
Úr / From 5 Invocations
– Stella matutina
– Electa ut sol

Franz Liszt (1811–1886)
Saint François d’Assise – La prédication aux oiseaux
(Transcription: Camille Saint-Saëns, 1835–1921)

Thierry Escaich (1965-)
Versets sur le Victimae paschali

David Cassan (1989-)
Spuni / Improvisation

HALLGRÍMSKIRKJA – ÞINN TÓNLEIKASTAÐUR