Skagarokk snýr aftur!

Dagana 10. og 11. apríl nk. ætla 6 frábærar hljómsveitir að spila í Bíóhöllinni á Akranesi undir nafninu Skagarokk 2026.

Föstudagskvöldið verður spilað þungarokk:

Black Sabbath rokkmessa

Múr

Bastarður

Laugardagskvöldið er það önnur músík og örlítið léttari:

Hjálmar

Spacestation

Oyama

Akranes var oft kallað Skipaskagi á árum áður þegar Akranes var útgerðarbær og þaðan kemur Skaginn í Skagarokk.

Skagarokk er mini-festival!

Skagarokk var fyrst haldið í Bíóhöllinni á Akranesi árið 1989 og svo aftur 1990. Þar komu mestmegnis fram hljómsveitir frá Akranesi en tónlistarlífið á Akranesi þá var mjög blómlegt.

Siggi Sverris sem hafði verið með þungarokksþáttinn Bárujárn á Rás 2 og var ritstjóri Skagablaðsins var svo maðurinn á bakvið Skagarokk þegar það var stærst.

Hann hugsaði stórt og ákvað að gera alvöru Skagarokk í íþróttahúsinu á Akranesi í lok september 1992 og fékk hvorki meira né minna en Jethro Tull og Black Sabbath til að koma og spila á Akranesi. Já þetta er satt – það gerðist!

Jethro Tull spilaði fyrir 1500 manns c.a. á föstudagskvöldi og Black Sabbath fyrir 300 manns í íþróttahúsinu á Akranesi. Sveitin var þá nýkomin frá Suður Ameríku þar sem hún spilaði á stórum íþróttaleikvöngum fyrir tugi þúsunda.

Það var gríðarlegt tap af þessu tónleikahaldi og Siggi ákvað að segja þetta gott af Skagarokki.

En árið eftir var haldið Skagarokk aftur í Bíóhöllinni á Akranesi. Að því stóðu Bjarki Kaikumo söngvari hljómsveitarinnar Lipstick Lovers og Skagamaðurinn Ólafur Páll Gunnarsson sem starfaði þá sem hljóðmaður á Ríkisútvarpinu.

Á Skagarokki 1993 og 1994 spiluðu hljómsveitir og listamenn eins og Bubbi Morthens – Jet Black Joe – Olympia, Lipstick Lovers, Stripshow, Kombóið, Silfurtónar ofl.

Síðan eru liðin mörg ár og komið að fyrsta Skagarokkinu í 32 ár og nú er það ekki eitt kvöld heldur tvö – Festival í anda Skagarokks 92.