10 Ástæður

Stratford-systurnar þær Kat og Bíanka eru gjörólíkar þar sem Bíanka sækist sífellt í athygli og stráka á meðan Kat er andstæðan við Bíönku. Reglan á þeirra heimili er sú að Bíanka má eignast kærasta ef Kat eignast kærasta, sem virðist að sjálfsögðu ómögulegt. Það var þangað til að hann Kameron byrjaði í skólanum og varð um leið bálskotinn í Bíönku, en hvernig getur Kameron verið með Bíönku ef Kat á ekki kærasta? Kameron og vinur hans Mikki komast fljótt að þeirri niðurstöðu að þeir neyðast til að borga einhverjum til þess að taka Kat á deit, og hver annar er ríkari og heimskari heldur en hann Jói Donner? Jói dílar við Patrek að taka Kat á stefnumót en það þarf aðeins meira en sjarma og flott bros til þess að heilla Kat Stratford.

10 Ástæður er bráðskemmtilegur söngleikur byggður á kvikmyndinni 10 Things I Hate About You sem sló í gegn þegar hún kom út árið 1999 og nýtur enn mikilla vinsælda í dag. Mikill hæfileiki ríkir meðal stjórnenda sýningarinnar en leikstjóri verksins er Þórey Sigþórsdóttir, danshöfundurinn er Lea Alexandra Gunnarsdóttir og tónlistarhöfundurinn er Kristína Jóhannsdóttir. Komdu í Gamla bíó og sjáðu hvernig þessi æsispennandi saga endar, þú vilt ekki missa af þessu!