Kammerópera fyrir mezzosópran, selló og rafhljóð eftir Önnu Halldórsdóttur og Elísabetu Jökuls í uppsetningu sviðslista hópsins Spindrift Theatre. Flytjendur eru Tinna Þorvalds Önnudóttir mezzosópran og Júlía Mogensen sellóleikari.

„Ástin er svartur kjörvari

sígarettupakkar

sykurkar og kaffibolli

skrúfur

tommustokkur

á borði

úti í sólinni

og tvö hjörtu

og ég veit ekki

hvort þeirra

er mitt.“

Sagan fjallar um innri baráttu konu sem speglast í ofbeldisfullu ástarsambandi frá upphafi til enda. Hádramatísk og hversdagsleg í senn heyir hún baráttu draumsins við veruleikann og veltir því fyrir sér: hvað er það sem gerir hana að “alvöru konu” - Og hvar leynist hinn raunverulegi lykill að hamingjunni?

„Ég ætlaði ekki að svara

ef hann hringdi

en svo hringdi hann ekki

og þá varð ég brjáluð.“

Söguhetjan er með geðhvörf sem litar frásögnina þannig að úr verður rússibanareið á milli alsælu og dýpsta þunglyndis. En hvort sem persónan er stödd á toppnum eða botninum er kímnin aldrei langt undan - á þann hátt sem Elísabetu Jökuls einni er lagið.

Elísabetu þarf ekki að kynna fyrir landanum enda hefur hún fyrir löngu skrifað sig inn í sál þjóðarinnar með skáldsögum sínum, skáldævisögum og ljóðum - auk sviðsverka og gjörninga.

Undanfarið hefur hún vakið athygli fyrir skáldævisögur sínar og síðustu vetur hefur einleikurinn Saknaðarilmur snert hjörtu áhorfenda í Þjóðleikhúsinu.

Það má segja að Ástin ein taugahrúga eigi heima í röð þessara sjálfsævisagna, enda er þessi ljóð-saga, sem út kom árið 2015, byggð á ljóðskáldsins eigin ævi.

Þetta er fyrsta óperan sem samin er við texta Elísabetar - en eflaust ekki sú síðasta.

„… og ég hallast að því

að hann hafi verið mér sendur

svo ég þyrfti ekki

að sjá um ofbeldið gagnvart mér

sjálf.“

Ljóðabókin Ástin ein taugahrúga vakti sterk viðbrögð þegar hún kom út, hlaut Fjöruverðlaunin og var tilnefnd til Bókmenntaverðlauna Norðurlandaráðs.

Tónlist Önnu Halldórsdóttur gefur textanum nýja vídd, er bæði grípandi og aðgengileg. Segja má að hún höfði til breiðs markhóps og fangi jafnt athygli áhugafólks um óperu sem og þeirra sem lítið - eða jafnvel aldrei - hafa hlustað á óperu fyrr en nú.

Verkið var flutt í vinnslu sem tónleikauppfærsla í Mengi á Myrkum músíkdögum og í Norðurljósasal Hörpu á Óperudögum í Reykjavík árið 2023, og er nú flutt sem fullunnið sviðsverk á fjölum Tjarnarbíós.

Fleiri tilvitnanir sem hægt er að nota í texta um sýninguna eða í auglýsingar:

„Hann sagði að ég væri alvörukona og ég féll í trans á staðnum…“

„Við förum á ball

og ég er að hugsa um

að bera upp bónorð

þegar ég man eftir

geðhvörfunum mínum

svo það verður ekkert úr því…“

„...ég skil ekki af hverju ég gekk ekki út

en kannski vissi ég ekki

hvar dyrnar voru. “

„...hann býður mér í strætóskýlið

þar sem hann talar við guð

og það snjóar

og hann kallar svefnherbergið mitt

Ástarloftið.“

„Mér er sagt

að hann sé ofbeldismaður

en það er víst

ofbeldi að njósna um fólk

einsog mig langar

að njósna um hann“

„Hann segist vera

þakklátur

fyrir ástina

ég er að telja

afbrot hans

og þakklætið

er þar efst á lista.“

„Kvöldið áður en hann flytur inn

trúir hann mér fyrir því

að konur hafi oft skipt um sýlinder

til að varna honum inngöngu

og augu hans fyllast af tárum“

Aðstandendur:

Söngur: Tinna Þorvalds Önnudóttir

Sellóleikari: Júlía Mogensen

Tónskáld og tónlistarstjóri: Anna Halldórsdóttir

Saga og texti: Elísabet Jökulsdóttir

Leikstýra: Bergdís Júlía Jóhannsdóttir

Hreyfihönnun, ljósahönnun og tæknistjórn: Juliette Louste

Sviðs- og búningahönnun: Sara Hjördís Blöndal

Dramatúrgar: Anna Halldórsdóttir og Tinna Þorvalds Önnudóttir