Stórtónleikar Fjörgynjar – stuðningur við BUGL

Þetta er í 21 skiptið sem Lionsklúbburinn Fjörgyn stendur fyrir tónleikum til styrktar verkefna líknarsjóðs Fjörgynjar. Fyrstu styrktartónleikar Fjörgynjar voru haldnir árið 2003 og á hverju ári síðan hefur fjöldi landskunnra tónlistarmanna ávallt gefið vinnu sína til verkefnisins.

Nú í ár munu eftirfarandi tónlistarfólk koma fram:

• Baggalútur

• Emmsjé Gauti

• Gissur Páll Gissurarson

• Greta Salóme

• Guðrún Árný Karlsdóttir

• Guðrún Gunnarsdóttir

• KK

• Páll Rósinkranz

• Þór Breiðfjörð

Undirleikari: Lára Bryndís Eggertsdóttir

Kynnir er hinn landsþekkti Felix Bergsson

Fjörgyn leggur ríka áherslu á að beita sér fyrir velferð barna og unglinga. Í gegnum tíðina hefur klúbburinn stutt margvísleg verkefni, fyrir samtals um 190 milljónir á núvirði. M.a. hefur Fjörgyn fyrst og fremst stutt við Barnaspítala Hringsins og Barna- og unglingageðdeild Landspítalans (BUGL). Fjölmargir aðrir aðilar hafa einnig notið stuðnings frá klúbbnum, m.a. Ungmennafélagið Fjölnir, Ljósið, Skátafélagið Vogabúar, Stuðlar, Sólheimar, SPOEX, Umhyggja, Styrktarfélagið Broskallar (broskallar.is) o.fl.

Frá stofnun klúbbsins hefur Fjörgyn einnig gefið veglegar matargjafir eða innkaupakort til þurfandi fjölskyldna í Grafarvogi í samstarfi við Grafarvogkirkju og Íslensku Kristskirkjuna.

Án stuðnings fjölmargra aðila þar á meðal ykkar sem sækið tónleikana væri þetta ekki mögulegt.