Melissa Achten og Ida Nørby mynda saman RÁN; kammerhóp sem fléttar saman hljóðrænt ímyndunarafl sitt í gegnum selló og hörpu. Samspil Melissu og Idu byggir á spuna en þær semja einnig verk innblásin af þjóðlögum og goðsögnum, og hafa þannig mikla táknræna merkingu. Þær eru búsettar í Los Angeles og Kaupmannahöfn og hafa komið fram á tónleikum og hátíðum víða um heim.

Á þessum tónleikum tekur íslenski fiðluleikarinn Sólrún Ylfa Ingimarsdóttir einnig þátt í fléttu dúósins. Á efnisskránni er mínimalísk nútímatónlist; einleiksverk fyrir hörpu, selló og fiðlu annars vegar, og tríó og dúó hins vegar. Helmingur tónverkanna eru eftir kvenkyns tónskáld, en á dagskrá verður einnig íslensk tónlist auk þess sem Rán mun flytja eitt verk úr eigin smiðju. Nánari efnisskrá verður kynnt síðar.