Á þessum tónleikum koma fram Lindy Lin, Splitting Tongues og Jelena Ciric*

Harpa, í samstarfi við Tónlistarborgina Reykjavík, Rás 2 og Landsbankann, stendur fyrir Upprásinni, tónleikaröð sem tileinkuð er grasrót íslenskrar tónlistar, þvert á tónlistarstefnur. Upprásin fer nú fram þriðja árið í röð og munu samtals 27 hljómsveitir koma fram, þrjár á hverju tónleikakvöldi.

Tónleikaröðin er liður í því að framfylgja dagskrárstefnu Hörpu um bætt aðgengi grasrótar og ungs fólks í öllum tónlistargreinum og auka við fjölbreytni. Markmiðið er einnig að tónlistaráhugafólk geti gengið að því vísu að heyra fjölbreytta nýja íslenska tónlist, beint úr grasrót tónlistarlífsins, flutta við kjöraðstæður í tónlistarhúsi þjóðarinnar.

Miðaverð er aðeins 2000 kr. en hægt er að leggja til hærri upphæð í miðasöluferlinu sem rennur beint til listafólksins.

Lindy Lin

Lindy Lin er tónskáld og listakona búsett í Reykjavík. Hún fluttist til Íslands frá Shanghai árið 2023 og hóf mastersnám í sköpun, miðlun og frumkvöðlastarfi (NAIP) við Listaháskóla Íslands.  Fyrsta platan hennar, Her Insula, kom út árið 2023 í Shanghai. Hún stofnaði ásamt fleirum hávaðarokksveitina Yang Soup, hefur komið fram með Wet Flute Trio og starfað með listamönnum svo sem Örlygi Arnalds og Masaya Ozaki.

Hljóðheimur Lindy Lin er súrrealískur og afar persónulegur.  Kínversk flauta, kassagítar, raddspuni, drunur, hljóð úr heimilistækjum, hávær og lágvær rafhljóð sem bjaga, teygja, hægja og hraða og draga hlustandann inn í afar sérstæðan og áleitinn heim.

Splitting Tongues

Splitting Tongues spilar bræðing af grindcore, hardcore og goregrind. Hljómsveitin var stofnuð í mars 2024 með það markmið að spila hraða og ákafa tónlist. Splitting Tongues skipa Arnar Már Víðisson, Sindri Þór Atlason og Sigurður Már Gestsson.

Jelena Ciric

Tónlistarkonan Jelena Ciric hefur heillað áheyrendur víða með sinni mögnuðu söngrödd, hlýjum og djúpum lagasmíðum og einstökum hæfileikum til að miðla sögum. Í tónlist hennar má greina áhrif úr ólíkum áttum, meðal annars frá Serbíu, þar sem Jelena fæddist, sem og frá Kanada þar sem hún ólst upp. Árið 2021 hlaut fyrsta stuttskífa Jelenu „Shelters One“ Íslensku tónlistarverðlaunin sem þjóðlagaplata ársins en Jelena var einnig tilnefnd sem söngkona ársins sama ár. Hún hefur hlotið samtals fimm tilnefningar til verðlaunanna.

Önnur stuttskífa Jelenu „Shelters Two“ (2023) var valin á langlista Íslensku tónlistarverðlaunanna og eitt lag af plötunni, „Inside Weather“ var tilnefnt sem lag ársins. „Shelters Two“ var einnig tilnefnd til Kraumsverðlaunanna árið 2023 og valin Söngvaskáldaplata ársins í Morgunblaðinu af Arnari Eggerti Thoroddsen og Árna Matthíassyni sem kölluðu tónlistina „töfrandi“ og „marglaga“.

Með Jelenu koma fram Karl Pestka á fiðlu og Margrét Arnardóttir á harmonikku.