Kammerhópurinn Öræfi var stofnaður árið 2025 af þeim Sóleyju Þrastardóttur flautuleikara, Þórunni Harðardóttur víóluleikara og Ásdísi Arnardóttur sellóleikara og heldur hann nú sína þriðju tónleika.

Flutt verða fjögur ólík tónverk sem þó eiga fjölmargt sameiginlegt. Samsetning kammerhópsins er mjög óvenjuleg og hljóðfærin harla ólík, sem vafalaust er ein af ástæðum þess að ekki hafa mörg tónverk verið samin með þessari skipan.

Öll verkin sem verða flutt eru því nokkuð sérstök og tónskáldin leyfa sér að fara ótroðnar slóðir í að kanna nýjan hljóðheim. Tónverkin eru þó með nokkuð klassískri nálgun og uppbyggingu, en klárlega fá hljóðfærin að njóta sín hvert og eitt innan þeirra.

Tríóið Öræfi er ákaflega stolt af því að fá að flytja verk Báru Sigurjónsdóttur “Leiðin að settu marki?”, en verkið er hluti af stærri heild sem tónskáldið hefur unnið að síðustu misseri og var frumflutt af Öræfi fyrr á árinu.

Tónleikarnir eru um klukkutími að lengd og gefa áhorfendum tækifæri til að kynnast kammermúsík á nýjan en þó aðgengilegan hátt, heyra þessi ólíku hljóðfæri spila saman en líka í sitthvoru lagi og mynda skemmtilega margslungna heild.

Tónleikarnir eru hluti af tónleikaröðinni Hvítar Súlur-Tónlistarfélagið og eru haldnir í samstarfi við Menningarfélag Akureyrar.