Almenn miðasala á tónleika Kammermúsíkklúbbsins hefst á Menningarnótt, 23. ágúst, en fram að því er hægt að kaupa árskort Kammermúsíkklúbbsins í miðasölu Hörpu og á vef Hörpu. Kortin verða tilbúin til afhendingar í miðasölu Hörpu frá og með 23. ágúst en þá heldur Kammermúsíkklúbburinn stutta tónleika sem eru hluti af Menningarnæturdagskrá Hörpu.

Tónleikarnir eru helgaðir Dmitri Shostakovich, einu merkasta og dáðasta tónskáldi 20. aldarinnar, í tilefni þess að í ágúst 2025 verða liðin 50 ár frá því að hann lést í Moskvu. Á tónleikunum heyrum við æskuverkið Píanótríó nr. 1 sem hann samdi aðeins 16 ára gamall, en Sónötu fyrir fiðlu og píanó samdi hann ekki fyrr en um hálfri öld síðar. Tónleikarnir enda á síðasta verkinu sem Shostakovich lauk við að semja, aðeins örfáum vikum áður en hann lést, en það var hin magnþrungna Sónata fyrir víólu og píanó.

Efnisskrá

Dmitri Shostakovich (1906 - 1975)

Sónata fyrir fiðlu og píanó í G-dúr, op. 134

I. Andante

II. Allegretto

III. Largo

Píanótríó nr. 1 í c-moll, op. 8

HLÉ

Sónata fyrir víólu og píanó, op. 147

I. Moderato

I. Allegretto

III. Adagio

Flytjendur

Judith Ingólfsson, fiðla / víóla

Bryndís Halla Gylfadóttir, selló

Vladimir Stoupel, píanó

Judith Ingólfsson, sem fæddist í Reykjavík og skaust upp á stjörnuhimininn þegar hún vann Indianapolis fiðlukeppnina 1998, leikur hér á bæði fiðlu og víólu ásamt eiginmanni sínum og dúófélaga Vladimir Stoupel. Með þeim leikur sellóleikarinn Bryndís Halla Gylfadóttir.

Tónleikar Kammermúsíkklúbbsins eru hluti af Sígildum sunnudögum í Hörpu.

Smellið hér til að heimsækja vef Kammermúsíkklúbbsins.