Hin goðsagnakennda breska rokkhljómsveit Dire Straits, sem hefur selt yfir 120 milljón hljómplötur um allan heim, lifnar nú við á ný í formi hljómsveitarinnar Dire Straits Legacy, skipuð fyrrum meðlimum Dire Straits. Hljómsveitin kemur til Íslands í upphafi einmánaðar og heldur tónleika í Hörpu þann 20. mars 2026. Um sannkallaðan stórviðburð er að ræða, því í hópnum eru margir af fremstu tónlistarmönnum heims í dag.

Alan Clark var fyrsti hljómborðsleikari Dire Straits. Hann er handhafi Grammy-verðlauna og meðlimur í Rock’n’roll Hall of Fame. Hann gekk til liðs við Dire Straits árið 1980 sem aðalhljómborðsleikari og var meðlimur í sveitinni allt þar til hún leystist upp árið 1992. Hann var einnig meðframleiðandi plötunnar On Every Street. 

Phil Palmer og Danny Cummings tóku báðir þátt í upptökum On Every Street, og Mel Collins lék á laginu Love Over Gold og smáskífuna Twisting by the Pool. Þeir hafa allir komið fram með Dire Straits á fjölmörgum heimsferðalögum. 

Aðrir meðlimir DSL eru meðal annars bassaleikarinn Steve Walters (sem hefur unnið með Amy Winehouse, James Taylor, Everything But The Girl og George Michael), Primiano Di Biase, og ekki síst söngvarinn og gítarleikarinn Marco Caviglia, sem margir telja helsta sérfræðing heimsins þegar kemur að hinum einstaka gítarstíl Mark Knopflers. Einnig er trommuleikarinn og Grammyverðlaunahafinn Cristiano Micalizzi með í för. 

Á tónlelikasýningu Dire Straits Legacy munu öll helstu Dire Straits-lögin hljóma, þar á meðal; Money for Nothing, Sultans of Swing, Romeo and Juliet, Walk of Life, Brothers in Arms, Tunnel of Love og mörg fleiri.