TÍMINN OG VATNIÐ - SÖNGHÁTÍÐ Í HAFNARBORG

Hjónin Rannveig Káradóttir, sópransöngkona og Peter Aisher, tenór, ásamt píanóleikaranum Hrönn Þráinsdóttur flytja ljóðatónleika þar sem tíminn og vatnið eru í aðalhlutverki. Hinar ýmsu birtingarmyndir þessara óstöðvandi afla flæða óhindraðar í gegnum verk eftir Duparc, Bizet, Fauré, Schubert, Clöru Schumann, Wolf, Vaughan Williams og fleiri. Sérhvert tungumál hefur sína áferð og hinir mismunandi tónaheimar blása lífi í hugleiðingar um ísblátt vatn, vængjaðar stundir og tímans djúpu sár. Rauður þráður í formi tónsetninga Helga Rafns Ingvarssonar á íslenskum ljóðum saumar þessi ólíku tónverk saman í fallega heild sem hefst á nokkurs konar sönglesi og vefur sig liðlega í gegnum árstíðirnar. Sérhver árstíð hefur sitt eigið tilfinningalitróf sem oft endurspeglast í fasa vatnsins hverju sinni og í tónlistinni er einnig margsinnis hægt að greina hreyfingu þess og stefnu. Frumflutningur á lagi Helga Rafns, Hallar nú haustrænum dögum, við ljóð Sæmundar G. Jóhannessonar, sem var sérstaklega samið í tilefni þessara tónleika, mun skipa sérstakan og eftirminnilegan sess í þessari tónlistarveislu.

Rannveig Káradóttir sópran lauk Master of Music in Performance gráðu frá Royal College

of Music í London eftir nám á Íslandi og Ítalíu. Hún hefur sungið hlutverk Violettu í La traviata, Donnu Önnu úr Don Giovanni og Mimì í la Bohème á Rye Arts Festival með Euphonia Opera Company og hlutverk Violettu í Drayton Arms Theatre í London. Rannveig ferðaðist víða um Evrópu með óperunni Be with me now í samvinnu við ENOA sem var frumsýnd á Aix-en-Provence Festival 2015 með frekari sýningum í Amsterdam, París, München, Lissabon, Varsjá, Brussel og Aldebourg. Hún fór með hlutverk Cio-Cio-San úr Madam Butterfly hjá Menter Rhosygilwen í Wales, Tatyönu í Eugin Onegin í Whitgift Theatre í South Croydon og Violettu í Château de Panloy í Frakklandi með Westminster Opera. Á árunum 2018 til 2023 var hún gestasöngvari og síðan fastráðin við Landestheater Coburg og fór meðal annars með hlutverk Lauru í Neues vom Tage, Fyrstu dömu í Töfraflautunni, Fiordiligi í Così fan tutte, Fedoru í die Zirkusprinzessin og Rusölku í Fishing for Rusalka. Ást Rannveigar á íslenskum sönglögum varð til þess að hún gaf út diskinn Krot — Íslensk sönglög árið 2016 með Birnu Hallgrímsdóttur, píanóleikara.

Peter Aisher tenór hóf krefjandi tónlistarnám tíu ára gamall sem kórdrengur í Windsor Castle þar sem hann söng átta guðþjónustur á viku með kirkjukórnum og lærði á píanó og klarinett, en hann leikur einnig á saxófón og rafmagnsbassa. Peter lærði stjarneðlisfræði við háskólann í Cambridge þar sem hann var á kórstyrk við Clare College. Eftir að hafa lokið meistaranámi sínu hóf hann framhaldsnám í Royal College of Music og lærði klassískan söng undir handleiðslu Tim Evans-Jones. Hann vann til fjölmargra verðlauna, útskrifaðist með láði og fékk í kjölfarið inngöngu í RCM International Opera School. Árið 2016 flutti hann til Þýskalands og fékk stöðu sem unglistamaður við Deutsche Oper am Rhein í Düsseldorf þar sem hann kom fram í um það bil 120 óperusýningum yfir tvö leikár. Sem fastráðinn einsöngvari við Landestheater Coburg fór hann meðal annars með hlutverk Tamino í Töfraflautunni, Ferrando í Così fan tutte, Tom Rakewell í Rake’s Progress og Edgardo í Lucia di Lammermoor. Hann söng einnig veigamikil hlutverk í óperettunum Vetter aus Dingsda, Wiener Blut og Die Fledermaus.

Hrönn Þráinsdóttir stundaði framhaldsnám við píanóleik við Staatliche Hochschule für Musik í Freiburg og lauk þaðan diplóma kennaraprófi vorið 2004 og tók meðleik við ljóðasöng sem aukafag. Kennarar hennar voru Dr.Tibor Szász og Hans-Peter Müller. Að því loknu nam hún við ljóðasöngdeild Tónlistarháskólans í Stuttgart undir handleiðslu Cornelis Witthoefft og lauk sérhæfðu diplómanámi sumarið 2007. Hrönn hefur komið fram á tónleikum víða sem einleikari, meðleikari og við flutning kammertónlistar auk þess að hafa hljóðritað fyrir útvarp og leikið inn á geisladiska. Hún hefur verið virk í uppeldisstarfi ungra söngvara, verið tónlistarstjóri uppfærslna hjá óperudeild Söngskólans í Reykjavík þar sem fluttar hafa verið perlur óperubókmenntanna. Hún hefur einnig ferðast víða um land og kynnt óperutónlist og hið íslenska sönglag fyrir grunnskólabörn í öllum landshlutum. Hún er einn helsti meðleikari óperusöngvara á Íslandi og hefur verið afar virk í tónleikahaldi á Íslandi. Hrönn er kennari við Söngskólann í Reykjavík, Söngskóla Sigurðar Demetz og við Menntaskóla í tónlist, MÍT.

Athugið að hægt er að kaupa hátíðarpassa á 14.900 kr. sem gildir á alla tónleika á

Sönghátíð í Hafnarborg 14.6.-29.6.2025. Takmarkað upplag er í boði.

EINA SUMARNÓTT

SÖNGHÁTÍÐ Í HAFNARBORG

14.6–29.6.2025

TÓNLEIKAR:

TÍMINN OG VATNIÐ

Lau. 14.6. kl. 17:00

Rannveig Káradóttir, Peter Aisher, Hrönn Þráinsdóttir

ÞAÐ VAR EITT KVÖLD

Sun. 15.6. kl. 17:00

Mótettukórinn, Stefan Sand

ÍSLENSK EINSÖNGSLÖG Í MINNINGU JÓNASAR INGIMUNDARSONAR

Lau. 21.6. kl. 17:00

Kristinn Sigmundsson, Sigrún Hjálmtýsdóttir (Diddú), Auður Gunnarsdóttir, Guðrún Jóhanna Ólafsdóttir, Hrönn Þráinsdóttir, Helga Bryndís Magnúsdóttir, Francisco Javier Jáuregui

DRAUMAR ÚR NORÐRI

Sun. 22.6. kl. 17:00

Jóna G. Kolbrúnardóttir, Kristín Sveinsdóttir, Unnsteinn Árnason, Eva Þyri Hilmarsdóttir

MASTER CLASS TÓNLEIKAR

Fim. 26.6. kl. 20:00

Nemendur Kristins Sigmundssonar, Helga Bryndís Magnúsdóttir

FJÖLSKYLDUTÓNLEIKAR

Fös. 27.6. kl. 17:00

Hanna Ágústa Olgeirsdóttir, Sigríður Ásta Olgeirsdóttir

ONE'S FOR SORROW, TWO'S FOR JOY

Lau. 28.6. kl. 17:00

Tríó Trëi: Mara Miribung, Gizem Simsek, Abélia Nordmann

ÓPERUGALA

Sun. 29.6. kl. 17:00

Bryndís Guðjónsdóttir, Eggert Reginn Kjartansson, Guðrún Jóhanna Ólafsdóttir, Jóhann Kristinsson, Elena Postumi

Eina sumarnótt

Sönghátíð í Hafnarborg 2025

Hin árlega Sönghátíð í Hafnarborg fer fram dagana 14.–29. júní 2025 undir heitinu Eina sumarnótt, sem vísar í lag Jóns Nordal Hvert örstutt spor við ljóð eftir Halldór Laxness.

Hátíðin býður upp á átta opinbera tónleika í aðalsal Hafnarborgar með vönduðum tónlistarmönnum af ólíkum kynslóðum. Alls taka á sjöunda tug tónlistarmanna virkan þátt í hátíðinni í ár. Sumir þeirra eru búsettir á Íslandi en aðrir koma sérstaklega til landsins til að koma fram, þar á meðal söngvararnir Jóhann Kristinsson, Rannveig Káradóttir, Peter Aisher, Trio Trëi og píanóleikarinn Elena Postumi.

Á Sönghátíð má hlusta á fjölbreytta tónleika með gamalli og splunkunýrri íslenskri og erlendri tónlist. Þar verður íslenska einsöngslagið í hávegum haft á sérstökum tónleikum tileinkuðum píanóleikaranum Jónasi Ingimundarsyni sem lést nýlega. Einnig má heyra erlendan ljóðasöng, þjóðlög, kórverk, frumsamin verk og atriði úr óperum.

Á hátíðinni syngja ekki einungis sumir af okkar reyndustu klassísku söngvurum eins og Kristinn Sigmundsson og Diddú (Sigrún Hjálmtýsdóttir), heldur einnig þeir sem rétt eru að hasla sér völl núna og bjartar vonir framtíðarinnar.

Sönghátíð í Hafnarborg hlaut Íslensku tónlistarverðlaunin sem Tónlistarhátíð ársins 2020. Hún var stofnuð árið 2017 og fer því níunda árlega hátíðin fram í ár. Auk tónleika býður hún upp á master class námskeið Kristins Sigmundssonar fyrir söngnemendur og söngvara, tónlistar- og myndlistarnámskeið fyrir 6–12 ára, tónlistarsmiðju fyrir 3–5 ára með foreldrum og krílasöng fyrir 6–18 mánaða með foreldrum.

Markmið hátíðarinnar er að koma list raddarinnar á framfæri með tónleikum og námskeiðum. Jafnframt er horft til framtíðar með því að birta á YouTube síðu hátíðarinnar viðtöl við söngvara og valdar myndbandsupptökur af tónleikum.

Sönghátíð í Hafnarborg er sjálfstæð hátíð, sem haldin er í gjöfulu samstarfi við Hafnarborg. Hátíðin í ár nýtur stuðnings Hafnarfjarðarbæjar, Tónlistarsjóðs, Menningarsjóðs FÍH og erlendra styrkja. Við þökkum kærlega stuðninginn.

Góða skemmtun!

Guðrún Jóhanna Ólafsdóttir og Francisco Javier Jáuregui,

stofnendur og stjórnendur Sönghátíðar í Hafnarborg.

Dagskrá hátíðarinnar má skoða á vefsíðunni www.songhatid.com

Miðasalan fer fram á Tix.

NÁMSKEIÐ Á SÖNGHÁTÍÐ Í HAFNARBORG:

SÖNGSMIÐJA OG MYNDLISTARNÁMSKEIÐ

23. júní – 27. júní

9:00–12:00 & 13:00–16:00

Fyrir 6–12 ára

Hanna Ágústa Olgeirsdóttir, Ýr Káradóttir, Unnur Mjöll S. Leifsdóttir

TÓNLISTARSMIÐJA

28. júní

kl. 11:00–11:45

kl. 13:00–13:45

Valgerður Jónsdóttir

Fyrir 3–5 ára með foreldrum

MASTER CLASS

23.–26. júní

kl. 9:30–16:30

Kristinn Sigmundsson

Fyrir söngnemendur og söngvara

KRÍLASÖNGUR

29. júní

kl. 11:00–11:45

kl. 13:00 og 13:45

Svafa Þórhallsdóttir

Fyrir 6–18 mánaða með foreldrum

Skráning á námskeið fer fram í gegnum vefsíðu hátíðarinnar: www.songhatid.com