Heimildarsýningin Stroke snýr aftur! Hjartnæm og grátbrosleg sýning sem hlaut þrjár tilnefningar til Grímunnar 2024 í flokkunum sýning ársins, leikkona í aðalhlutverki og hvatningarverðlaun.

Eftir hlé snýr sviðslistahópurinn Trigger Warning aftur með þessa einstöku sýningu sem hefur reynst græðandi og skilur engan eftir ósnortin. Persónuleg saga sem á erindi við alla þá sem hafa reynslu af heilablóðfalli af eigin hendi eða sem aðstandendur.

Þegar Virginia vaknaði eftir heilablóðfall var það eins og súrrealískt atriði úr trúðaleikriti. Hún var með verk- og málstol sem gerði hana að fanga í eigin líkama og hinar hversdagslegustu gjörðir urðu að þrautabraut. Áfallið breytti öllu og að útskýra upplifunina af heilablóðfallinu fyrir öðrum hefur reynst erfitt.

Fyrir áfallið starfaði Virginia lengi sem atvinnutrúður á sjúkrahúsum í Glasgow og Edinborg. Starfið snerist um að lífga upp á daga langveikra barna og fólks með heilabilun. Í dag er hún því hinumegin við borðið og veit hreinlega ekki hvort hún eigi að gráta eða hlægja að fáránleikanum. Eiginmaður Virginiu, Sæmundur, þurfti einnig að horfast í augu við nýjan veruleika og finna út úr hlutverki sínu sem aðstandandi. Saman áttuðu þau sig fljótlega á því að húmorinn var besta meðalið í veruleika sem hafði verið snúið á hvolf.

Í verkinu miðla því Virginia og Sæmi, sem trúðarnir Cookie og It, upplifun sinni af áfallinu og endurhæfingunni. Þeirri sögu er jafnframt ofið saman við reynsluheim Virginiu úr leikhúsinu og heimsmynd hennar í tengslum við virkni trúðsins. Útkoman er einstök flétta um áföll, töfra sköpunarkraftsins, umhyggjusemi og seiglu.

Stroke er frumsamið samsköpunar heimildaverk eftir Virginiu Gillard og sviðslistahópinn Trigger Warning.

Trúðurinn Cookie og Virginia: Virginia Gillard

Trúðurinn It og Sæmi: Sæmundur Andrésson.

Leikstjórn og dramatúrgía: Andrea Elín Vilhjálmsdóttir og Kara Hergils.

Leikmynd og búningar: Brynja Björnsdóttir

Frumsamin tónlist: Ingibjörg Ýr Skarphéðinsdóttir

Ljósahönnun: Jóhann Friðriksson

Tæknistjóri og sýningakeyrsla: Kristín Waage.

Aðstoðarmaður í hljóði: Valgerður Embla Grétarsdóttir

Starfsnemi: Olga Maggý Winther.

Stroke var frumsýnt í nóvember 2023 með styrk frá Sviðslistasjóði og Starfslaunasjóði Listamannalauna.

Trigger Warning er íslenskur sviðslistahópur sem hefur frá árinu 2016 skapað sýningar með aðferðum samsköpunar og heimildarleikhúss. Stroke er þriðja verk okkar sem tekist á við samfélagsleg málefni í krafti einsögunnar. Hún pabbi fjallaði um upplifun Hannesar Óla leikara af kynleiðréttingaferli föður síns og verkið Velkomin heim fjallaði um upplifun Maríu Thelmu leikkonu af því að eiga móður sem kemur frá Taílandi og hvernig var fyrir Maríu að alast upp á Íslandi af blönduðum uppruna. Við leitumst við að skapa valdeflandi leikhús sem fagnar fjölbreytileikanum og skapar rými fyrir áður óheyrðar raddir á sviðum landsins.

Virginia Gillard er bresk leikkona, trúður og ljóðskáld búsett á Íslandi. Hún hóf leiklistarferilinn sinn í Ástralíu áður en hún fór að læra líkamlegt leikhús og trúðalist í Sviss, Frakklandi og Englandi. Árið 2000 hóf Virginia störf sem trúða læknir í verkefni sem heitir Hearts and Minds þar sem hún vann með börnum á sjúkrahúsum og í öðru verkefni sem heitir Elderflower með eldri einstaklingum með heilabilunarsjúkdóma. Á Íslandi lék hún í HVÍTT og hefur komið að mörgum leikhópum, þar á meðal Góðir gestir, Gaflaraleikhúsinu og Leikhúsi barnanna. Hið síðarnefnda er leikhópur í Landakotsskóla þar sem Virginia starfaði sem leiklistarkennari. Hún hefur einnig komið fram í íslensku sjónvarpsþáttunum og tekið þátt í ýmsum kvikmyndum og stuttmyndum. Með fjölbreyttan feril að baki heldur Virginia áfram að næra samfélagið með list sinni.

Sæmundur Andrésson er íslenskur performer, trúður og leikmyndasmiður. Ferill hans í sviðslistum hófst þegar hann lék í sjálfstæðum leiksýningum hér á landi og starfaði síðan sem leikmyndasmiður bæði í Bretlandi og á Íslandi hjá ýmsum stórfyrirtækjum. Að búa til auglýsinga-, ráðstefnu-, leikhús-, sjónvarps- og kvikmyndasett. Hann vann síðustu ár með Virginiu Gillard við að framleiða og setja upp leiksýningar. Samstarf Sæmundar við Virginiu í Stroke undirstrikar hollustu hans við sviðslistir og stuðning hans við listræna tjáningu Virginiu.

1/2

„Það er alltaf sérstök nautn fyrir leikhúsunnendur þegar tekst að láta ólíkar listrænar aðferðir vinna saman sem órofa heild. Ekki síst af því að það er ekki á vísan að róa með slík vinnubrögð. Hér gengur allt upp. Vel unnin og valin myndbönd úr heimildaleikhúsinu, framúrskarandi hönnun sjón- og hljóðrænna þátta og töframáttur trúðleiksins. Og síðast en ekki síst örlát og hugrökk frammistaða Virginiu Gillard við að deila sinni sárustu lífsreynslu þannig að ógleymanlegt verður.“

• Þorgeir Tryggvason, Morgunblaðinu

„Virginia í hlutverki Cookie er bráðfyndin. Hún nær að nota húmor handan tungumálsins og með svipbrigðum, tónfalli og viðbrögðum kitla hláturtaugarnar listilega. Hún nær einnig tengingu við hjartarætur áhorfenda. Ekki aðeins með magnaðri sögu sinni heldur einnig með djúpri leiktjáningu og sterkri vinnu með tragikómík.“

• Eva Halldór Guðmundsdóttir, Víðsjá RÚV

Þessi sýning er svo falleg, svo mannleg, svo djúp og einlæg og yndisleg. Virginia gefur okkur svo fallega gjöf með því að stíga á svið og segja sögu sína.

• Sjöfn Asare, Lestarklefinn