Óratoríusveitin flytur Petite Messe Solennelle eftir Rossini ásamt Hljómeyki, einsöngvurum og hljóðfæraleikurum.

Óratoríusveitin og söngflokkurinn Hljómeyki flytja Litlu messu Rossini (Petite messe solennelle). Stjórnandi verður Stefan Sand. Einsöngvarar verða þau Vera Hjördís Matsdóttir, Hildigunnur Einarsdóttir, Þorbjörn Rúnarsson og Gunnlaugur Bjarnason. Eva Þyri Hilmarsdóttir og Erna Vala leika á píanó og Flemming Viðar Valmundsson leikur a harmóníku.

Þrátt fyrir nafnið (lítil hátíðleg messa) er messan þvert á móti stór í sniðum. Hún er skrifuð fyrir kór, einsöngvara, tvö píanó og eitt orgel en í flutningi þessum mun Flemming Viðar leika orgelpartinn á harmóníku. Verkið er raunar eitt af stórfenglegri verkum Rossini á síðari hluta ferilsins. Í verkinu má auðheyrilega finna óperulegt yfirbragð í dramatískum laglínum og augnablikum en einnig kyrrláta andlega fegurð. Rossini kallaði verkið sjálfur ,,síðasta synd gamals manns” og endurspeglar það hæfileika hans til að sameina hið helga og hið leikræna, jafnvel í trúarlegu samhengi.

Óratoríusveitin er nýtt félag sem stofnað var af Stefani Sand stjórnanda og söngvurunum Gunnlaugi Bjarnasyni og Veru Hjördísi Matsdóttur. Félagið stendur að flutningi á óratoríum og öðrum konsertverkum skrifuð fyrir söngvara og hljóðfæraleikara. Markmið sveitarinnar er að skapa ungu og upprennandi tónlistarfólki sem eru að stíga sín fyrstu skref að námi loknu, tækifæri til að koma fram við hlið reyndara tónlistarfólks og öðlast þar með dýrmæta reynslu. Sveitin leitast einnig við að brjóta upp hið hefðbundna tónleikaform, t.d. með því að leggja áherslu á túlkunar- og leiklistarlegu hlið verkanna og þar með styrkja sjónræna upplifun áheyrenda.