Magnús Jóhann í Árbæjarkirkju - Einleikur

Þrátt fyrir að hafa starfað sem tónlistarmaður á Íslandi í um 10 ár hef ég aldrei komið fram á mínum heimaslóðum í Árbæ. Það er auðvitað ótækt sem ævilangur íbúi í Árbæ og Fylkismaður. Því er ekki seinna vænna en að kippa því í liðinn og halda tónleika í Árbæjarkirkju, þar sem ég fermdist hjá séra Þór fyrir fimmtán árum. Í ár ætla ég að vera duglegri við að halda einleikstónleika, leika eigin tónlist og gera tilraunir með hana. Kirkjur landsins eru kjörinn vettvangur til þess og ég hlakka mikið til að hefja leikinn í Árbæjarkirkju.

Ég mun leika valin lög af flestum hljómplötum mínum og nokkur af mínum uppáhalds verkum eftir aðra. Flygillinn verður mér við hönd auk nokkurra traustra hljóðgervla. Tónleikarnir verða kl 20:00 sunnudaginn 23. mars. Miðaverð er 3.900 kr og húsið opnar hálftíma fyrir tónleika. Hlakka til að sjá ykkur sem flest!

Magnús Jóhann Ragnarsson hefur frá árinu 2015 hefur verið mjög virkur sem tónlistarflytjandi, tónskáld og upptökustjóri en hann hefur leikið inná hundruði hljóðrita og kemur fram á fjölmörgum tónleikum á ári hverju. Moses Hightower, Friðrik Dór, Bríet, Aron Can og Bubbi Morthens eru dæmi um samsstarfsaðila hans en sjálfur hefur Magnús gefið út fjölda sólóplatna og tvær stuttskífur. Auk þeirra gaf hann út dúóplöturnar Án tillits 2021, með Skúla Sverrissyni, Tíu íslensk sönglög 2022 og Nokkur jólaleg lög 2024 með GDRN auk Fermented Friendship með Óskari Guðjónssyni 2024. Magnús Jóhann var valinn tónlistarflytjandi ársins í opnum flokki á Íslensku Tónlistarverðlaununum 2023 og er einn af stofnendum tónlistarhátíðarinnar State of the Art sem fór fram í fyrsta sinn haustið 2024. Hann er einnig tilnefndur í fjórum flokkum til Íslensku Tónlistarverðlaunanna 2025 og til Edduverðlaunanna fyrir tónlist sína í kvikmyndinni Ljósvíkingar.