Fögur eiginkona, tvær ungar og óstýrilátar dætur, aðþrengd mágkona, gráðug tengdamamma, dularfull ráðskona og kynþokkafull þjónustustúlka eru veðurtepptar í sumarbústað við Þingvallavatn. Húsbóndinn sjálfur liggur sofandi í rúmi sínu uppi á lofti. Eða hvað? Þegar sjö villtar konur eru samankomnar og sú áttunda bætist í hópinn getur allt gerst! Átta konur er Glæpsamlegt gamanverk með söngvum og dansi sem gefur loforð um ógleymanlega kvöldstund í litla leikhúsinu við Sigtún.

 Leikverkið Átta konur er eftir franska leikskáldið Robert Thomas (1927-1989). Verkið var frumflutt í París árið 1961, vann til verðlauna og var leikið við miklar vinsældir. Margar af fremstu leikkonum Frakklands léku svo árið 2002 í kvikmynd sem byggð var á verkinu og varð ekki síður vinsæl en leikritið.

 Verkið var fyrst sýnt á Íslandi í Þjóðleikhúsinu árið 2006. Fyrir þá uppsetningu aðlagaði Sævar Sigurgeirsson verkið íslenskum aðstæðum og samdi söngtexta.

 Leikstjóri er Rakel Ýr Stefánsdóttir.

Sýningin er sýnd í Litla leikhúsinu við Sigtún, Sigtúni 1 á Selfossi.