DesignTalks 2025

Alþjóðlega ráðstefnan DesignTalks fer fram þann 2. apríl 2025 í Silfurbergi í Hörpu undir þemanu Uppspretta.

DesignTalks hefur verið lykilviðburður HönnunarMars frá upphafi og er sá stærsti á sínu sviði hér á landi. Að venju mun stórkostlegur hópur hönnuða, arkitekta og skapandi hugsuða koma fram og án efa þenja ímyndunaraflið.

Það er enn að bætast í hópinn en staðfestir fyrirlesarar eru arkitektinn Lina Ghotmeh, sem lýsir nálgun sinni sem „fornleifafræði framtíðar” og Ferdinando Verderi, sem er creative director sem ber ábyrgð á sumu af róttækasta myndmáli tískuheims síðasta áratugar með brautryðjandi aðferðum í auglýsingagerð. Heimspekingurinn Emanuele Coccia, sem leiðir okkur um hverfulleika tilveru okkar og samband við fagurfræði og arkitektinn Arnhildur Pálmadóttir, fjölhæfur sérfræðingur með frumkvöðlaviðhorf og áherslu á að vinna að breytingum í arkitektúr og mannvirkjagerð. Hönnuðurinn Fernando Laposse fjallar um verk sem takast á við og upphefja handverksarfleifðir frumbyggjasamfélaga og Lilja og Ingibjörg Birgisdætur, Fischersund listasamsteypunni segja fjölskynjunarsögur af fortíð í nútíð sem hreyfa við öllum skynfærum.
„Við leitum í uppsprettuna fyrir innblástur og endurskoðun. Horfum um öxl og stöldrum við til að hefja okkur til flugs á ný.” - Hlín Helga, listrænn stjórnandi DesignTalks

Miðaverð á DesignTalks;
Fyrir félagsmenn: 18.900 kr
Fyrir almenning: 20.900 kr.

Hlín Helga Guðlaugsdóttir er listrænn stjórnandi og Þura Stína Kristleifsdóttir framleiðir fyrir Miðstöð hönnunar og arkitektúrs.