Flytjendur
Rósa Guðrún Sveinsdóttir, söngur, flauta og saxófónn
Þórdís Gerður Jónsdóttir, selló
Sara Mjöll Magnúsdóttir, píanó

Um tónleikana
Meraki tríó er skipað þeim Rósu Guðrúnu Sveinsdóttur sem syngur og leikur á flautu og baritón-saxófón, Söru Mjöll Magnúsdóttur á píanó og Þórdísi Gerði Jónsdóttur á selló. Þær spila eigin tónsmíðar sem teljast til nokkuð hefðbundins jazz en með óvenjulegri hljóðfæraskipan auk frumlegra og leikglaðra útsetninga er lögunum ljáður ferskur blær. Selló, baritón saxófónn og píanó skiptast á hlutverkum laglínu, undirspils og bassa og búa þannig til margslunginn hljóðheim. Þá hefur Meraki tríó verið óhrætt við að útsetja lög eftir aðra listamenn á nýstárlegan máta. Í september 2024 gaf tríóið út sína fyrstu hljómplötu, titlaða "Meraki tríó" sem inniheldur sex frumsamin lög. Meðlimir tríósins hafa bakgrunn úr ólíkum tónlistarstílum, allt frá barokktónlist og klassík yfir í popp og blús, og nýta fjölbreyttan bakgrunn og sameiginlegan áhuga á jazzi til að búa til tónlist sem á sama tíma er vinaleg, hjartnæm og svöl. Á tónleikunum munu þær spila efni af nýútgefinni plötu ásamt nýju efni og útsetningum á öðru efni.