Á þessum tónleikum koma fram Áslaug Dungal, Osme og rauður

Harpa, í samstarfi við Tónlistarborgina Reykjavík, Rás 2 og Landsbankann, stendur fyrir nýrri tónleikaröð sem tileinkuð er grasrót íslenskrar tónlistar, þvert á tónlistarstefnur. Tónleikaröðin kallast Upprásin og fer fram í Kaldalóni eitt þriðjudagskvöld í mánuði veturinn 2024-2025. Hún fer nú fram annað árið í röð og munu samtals 27 hljómsveitir koma fram, þrjár á hverju tónleikakvöldi.

Tónleikaröðin er liður í því að framfylgja dagskrárstefnu Hörpu um bætt aðgengi grasrótar og ungs fólks í öllum tónlistargreinum og auka við fjölbreytni. Markmiðið er einnig að tónlistaráhugafólk geti gengið að því vísu að heyra fjölbreytta nýja íslenska tónlist, beint úr grasrót tónlistarlífsins, flutta við kjöraðstæður í tónlistarhúsi þjóðarinnar.

Miðaverð er aðeins 2000 kr. en hægt er að leggja til hærri upphæð í miðasöluferlinu sem rennur beint til listafólksins.

***   Áslaug Dungal**

Áslaug Dungal er 24 ára gömul tónlistarkona sem hefur verið að koma fram með eigin tónlist undanfarin 2 ár. Hún spilar sjálf á rafmagnsgítar og syngur en með henni spila Jón G. Breiðfjörð á trommur og Borgþór Jónsson á bassa. Tónlistin er í shoegaze stíl og hún vinnur mikið með ambient hljóðheim.

• Osme

Hljómsveitin Osme spilar hugleiðsluþungarokk og samanstendur af reynsluboltum úr íslensku hljómsveitasenunni, en meðlimir hafa verið í böndum eins og Singapore Sling og Skátum. Osme leggja mikið upp úr sviðsframkomu og tilfinningu í sinni framsetningu, en tónlistin einkennist af ómþýðri, dáleiðandi dróntónlist með þungamálms-undirtóni. Sveitin leitast eftir því að ná fram leiðsluástandi sem þverar tíma og rými, og hvetja áheyrendur til umhugsunar um mikilvægi djúprar hlustunar í daglegu lífi, bæði við sjálfið og hvort annað.

***   rauður**

rauður er sviðsnafn tónlistarkonunnar Auðar Viðarsdóttur sem hóf sólóferil í Malmö árið 2016 eftir að hafa verið í hljómsveitinni Nóru. Tónlist rauðar er hægt að lýsa sem rafrænu landslagi með hljóðgervlum, sömplum og óhefðbundnum töktum. Söngurinn er tregafullur og svífur yfir vötnum, ólgusjó, yfir heimsenda eða úti í geimi. Rauður gaf út plötuna “Semilunar” við góðar undirtektir árið 2019, en hún mun taka lög af plötunni í bland við ný á Upprásinni.