Um viðburðinn

Elskar þú Eurovision en elskar mannréttindi meira? Þá erum við með viðburðinn fyrir þig!
Þann 11. maí verður haldin stórhátíð tónlistar og alþjóðafriðar í Þjóðleikhúskjallaranum - KLÚRÓVISION!

Sýningin mun innihalda allt það besta sem Eurovision hefur uppá að bjóða: glimmer, vindvélar, ljósasjóv og upphækkanir — og þar að auki verða atriðin í kabarett-búning! Húmor og hold, daður og dónaskapur, glys og glens - og auðvitað uppáhalds Eurovision lögin okkar!
Eurovision-þátttaka gerir Ísrael kleift að hvítþvo ímynd sína á alþjóðasviðinu á meðan þau eru markvisst að útrýma Palestínu í beinni útsendingu. En á Klúróvision er Ísrael og öðrum þjóðum sem styðja við þjóðarmorð einfaldlega bönnuð þátttaka. Þetta er ekki flókið.

Fyrir utan rýmisleigu rennur öll miðasala óskipt til Neyðarsöfnunar Félagsins Ísland-Palestína sem einblínir þessi misserin á að safna fjármagni fyrir Flóttamannahjálp Sameinuðu þjóðanna í Palestínu (UNRWA).
 
Uppsett miðaverð er 5.500 kr.
En einnig verður boðið upp á “pay what you can” við hurð, þar sem allir sem styðja fá að koma inn á meðan pláss leyfir.

Athugið að sýningin er ekki við hæfi yngri en 18 ára, þeirra sem hræðast undur mannslíkamans, eða þeirra sem styðja þjóðarmorð.