Obsidiana y Sangre er sýning þar sem tilfinningadýpt flamenco-hefðarinnar er teflt saman við ritúalíska ákefð samtímatjáningar. Verkið hefst í þögn en spennan er smám saman byggð upp með ómstríðum röddum og dýnamískum hreyfingum sem leiða áhorfendur í ferðalag inn í þjáningu, sársauka og kaþarsis. Hér er kafað í tilfinningalíf manneskjunnar í sínu hráasta formi svo úr verður kraftmikil upplifun fyrir öll skilningarvit.

Með því að reyna á þanþol raddar og líkama skapa flytjendurnir umbreytandi rými sem vekur sterkar kenndir með áhorfendum. Sýningin kallar fram djúpstæðar tilfinningar, ögrar viðteknum hugmyndum og býður áhorfendum að takast á við spennuna á milli þagnar og tjáningar, sársauka og losunar. Þetta er engin venjuleg sýning – þetta er ritúalísk rannsókn á breytingum og seiglu.

Curro Rodríguez (Spánn, 1980) er sviðslistamaður sem vefur saman flamenco-dans og samtímalist og rannsakar lífið, dauðann og menningarlega sjálfsmynd í gegnum alltumlykjandi

innsetningar, tónlist og lifandi gjörninga þar sem ritúal, líkami og rými sameinast í yfirskilvitlegri, listrænni upplifun.

Anto López Espinosa (Madrid, 1993) er sviðslistakona sem kannar ljóðlist líkamans og vinnur með möguleikana sem felast í „lip-syncing“. Í listsköpun sinni samtvinnar hún hljóð og líkama til þess að stuðla að sameiginlegri leit að ást og samastað.