Í Safnahúsinu við Hverfisgötu 15 verður boðið upp á tvöfalda efnisskrá. Annars vegar Tónskáldahringekjuna og hinsvegar frumflutning nýrrar tónlistar Miguel Atwood-Ferguson og Thomas Stankiewicz.

Tónskáldahringekjan hrekkur í gang í Safnahúsinu þann 10. október kl 20. Um borð í hringekjunni eru Ingibjörg Turchi - bassaleikari, Magnús Jóhann Ragnarsson - píanóleikari, Tumi Árnason - saxófónleikari, Björg Brjánsdóttir - flautuleikari, Bergur Þórisson - básúnuleikari og Bergrún Snæbjörnsdóttir - hornleikari. Hvert og eitt þeirra í þungavigtarflokki. Hringekjan fer þannig fram að hver meðlimur semur verk fyrir þann næsta í hringekjunni sem flytur verkið og semur svo annað fyrir næsta kollega þar til við erum komin í hring. Hringekjufararnir koma víða að og hafa fengist við tónlist saman og í sitthvoru horninu og munu því koma með spennandi veganesti í farteski sínu.

Miguel Atwood-Ferguson og Thomas Stankiewicz kynntust þegar þeir bjuggu báðir í Los Angeles og tengdust strax sterkum böndum. Vinátta þeirra hefur haft þær afleiðingar í för með sér að símreikningar beggja hafa hækkað talsvert nú þegar þeir eru búsettir í sitthvorri heimsálfunni. Óteljandi símtölum síðar sameinuðu þeir loks krafta sína til tónlistarsköpunar á Íslandi þar sem Thomas er nú búsettur. Tvíeykið vinnur nú að nýrri hljómplötu en á tónleikum þeirra á State of the Art verður boðið upp á forsmekkinn af tónlistinni sem er í vinnslu.

Í tónlistarlífi Los Angeles er Miguel Atwood-Ferguson lykilmaður en undanfarin 20 ár hefur hann starfað þar sem lágfiðluleikari, stjórnandi, útsetjari og margt fleira. Hann hefur fengist við sígilda tónlist, djass, hip hop, spunatónlist, r&b, sálartónlist og leikið inn á meira en 600 hljómplötur. Hann hefur starfað með listafólki á borð við Ray Charles, Ryuichi Sakamoto, Stevie Wonder, Quincy Jones, Henry Mancini, Esa- Pekka Salonen, Smokey Robinson, Wayne Shorter, Brad Mehldau, Dr. Dre, Chaka Khan, Erykah Badu, Anderson. Paak, Flying Lotus, Kamasi Washington og Thundercat svo að nokkur dæmi séu tekin.

Thomas Stankiewicz lauk bakkalárgráðu í tónsmíðum frá Listaháskóla Íslands árið 2022 og er feiknarfær gítarleikari. Hann hefur dvalist langdvölum í Los Angeles og Lundúnum og hefur komið sér upp öflugu tengslaneti innan tónlistargeirans. Hann hefur fengist við tónlist af ýmsum toga en hljóðfæratónlist stendur hjarta hans næst. Hann sér um vinsælan útvarpsþátt fyrir NTS radio í Lundúnum sem á sér dyggan hlustendahóp.