Á þessum tónleikum koma fram Samosa, Unfiled og Eló

Harpa, í samstarfi við Tónlistarborgina Reykjavík, Rás 2 og Landsbankann, stendur fyrir nýrri tónleikaröð sem tileinkuð er grasrót íslenskrar tónlistar, þvert á tónlistarstefnur. Tónleikaröðin kallast Upprásin og fer fram í Kaldalóni eitt þriðjudagskvöld í mánuði veturinn 2024-2025. Hún fer nú fram annað árið í röð og munu samtals 27 hljómsveitir koma fram, þrjár á hverju tónleikakvöldi.

Tónleikaröðin er liður í því að framfylgja dagskrárstefnu Hörpu um bætt aðgengi grasrótar og ungs fólks í öllum tónlistargreinum og auka við fjölbreytni. Markmiðið er einnig að tónlistaráhugafólk geti gengið að því vísu að heyra fjölbreytta nýja íslenska tónlist, beint úr grasrót tónlistarlífsins, flutta við kjöraðstæður í tónlistarhúsi þjóðarinnar.

Miðaverð er aðeins 2000 kr. en hægt er að leggja til hærri upphæð í miðasöluferlinu sem rennur beint til listafólksins.

• Samosa

Samosa var stofnuð árið 2023 út frá sólóverkefni sem leiddi af sér konseptplötu og rokkóperu um Landvætti Íslands. Tónlistina má lýsa sem hugvíkkandi rokki og ber með sér þjóðsagna- og draumkennt myndmál og þema. Samosa taka ýmis málefni raunveruleikans og sveipa þau dulspekilegu gervi með framsæknu sýrurokki.

• Unfiled

Unfiled er tvíhöfða skepna þeirra Atla Bollasonar og Guðmundar Úlfarssonar. Þeir hófu samstarf árið 2019 með röð tilraunakenndra sjónleika – viðburða þar sem hljóð og mynd skipa jafnstóran sess. Listsköpun þeirra snýst um endurómun (bæði bókstaflega og sem myndhverfingu), ferlana að baki merkingarsköpunar, sjónrænan spuna, minningar, drauga og suð. Auk þess að koma fram á tón- eða sjónleikum, hafa verk Unfiled verið sýnd í galleríum og tekið á sig hefðbundnari form á borð við prent og veggmyndir.

• Eló

Eló er ung tónlistarkona sem leggur áherslu á texta og melódíur, með persónulegum og hráum lögum sem faðma hlustandann þétt að sér. Eló varð í öðru sæti í Músíktilraunum 2024 og hlaut hún einnig höfundaverðlaun FTT. Lágstemmd og hugljúf tónlist hennar vekur upp sterkar tilfinningar, eins og gleði, sorg, væntumþykju og eftirvæntingu. Eló mun koma fram með hljómsveit á Upprásinni, en með henni verða Hjálmar Carl Guðnason á bassa, Ívar Andri Klausen á rafmagnsgítar, Bergsteinn Sigurðarson á trommum og Magnús Þór Sveinsson á hljómborði.