Hljómsveitin BREK fer í tónleikaferð um landið í júlí ásamt Hank, Pattie & the Current frá Norður-Karólínu í Bandaríkjunum undir yfirskriftinni Raleigh to Reykjavík.

Haldnir verða sex tónleikar víðsvegar um landið, en endað verður með pompi og prakt í Iðnó í Reykjavík þann 21. júlí þar sem hljómsveitin Blood Harmony bætist í hópinn sem sérstakir gestir.

Blood Harmony er verkefni Eldjárn tónlistarsystkinanna úr Svarfaðardal. Þau eru Ösp, Örn og Björk Eldjárn.

Einnig verður söngvaskáldið Svavar Knútur sérstakur gestur á Akureyri þann 18. júlí, en Svavar er fyrir löngu orðinn landsþekktur fyrir sínar frábæru lagasmíðar sem og hnittnar og skemmtilegar frásagnir.

Hljómsveitin BREK leikur akústíska alþýðu skotna tónlist með áhrifum úr ýmsum áttum, m.a. þjóðlagatónlist, jazzi og poppi. Að auki er fjölskrúðug notkun íslenskrar tungu í textagerðinni.

Hljómsveitin hlaut Íslensku tónlistarverðlaunin fyrir plötu ársins í þjóðlaga- og heimstónlist árið 2022 fyrir sína fyrstu plötu og er áhugafólki um vandaða íslenska tónlist löngu orðin kunn.

Meðlimir eru:

Harpa Þorvaldsdóttir - söngur og píanó

Jóhann Ingi Benediktsson - söngur og gítar

Guðmundur Atli Pétursson - mandólín og bakrödd

Sigmar Þór Matthíasson - kontrabassi og bakrödd

Hank, Pattie & the Current er samstarfsverkefni banjóleikarans Hank Smith og fiðluleikarans Pattie Hopkins Kinlaw. Þau eru bæði framúrskarandi á sínu sviði og virk í tónlistarlífinu

í Norður-Karólínu, bæði sem höfundar, flytjendur og kennarar.

Tónlist Hank, Pattie & the Current er í grunninn bluegrass tónlist en þau blanda saman áhrifum héðan og þaðan m.a. úr klassískri tónlist, sálartónlist, poppi og fleiru.

Meðlimir eru:

Hank Smith - banjó og söngur

Pattie Hopkins Kinlaw - fiðla og söngur

Billie Feather - gítar og bakrödd

Steven Martinez - kontrabassi og bakrödd

Hljómsveitirnar eiga það sem sagt sameiginlegt að sækja áhrif tónlistar sinnar víða að þó þær falli gróflega undir flokka folk, americana og bluegrass tónlistar.

Úr verður forvitnilegur bræðingur tónlistar úr ýmsum áttum.

Ekki láta þessa tónlistarveislu framhjá ykkur fara!

RALEIGH TO REYKJAVÍK 2024 - TÓNLEIKAFERÐ

16. júlí - Midgard Base Camp, Hvolsvelli

17. júlí - Tehúsið, Egilsstöðum

18. júlí - Verkstæðið, Akureyri  Sérstakur gestur Svavar Knútur

19. júlí - Segull 67, Siglufirði

21. júlí - Iðnó, Reykjavík.  Sérstakir gestir Blood Harmony

Nánar á:

facebook.com/brekband

facebook.com/hankandpattie

www.brek.is

www.hankandpattie.com