VÖKU 2025 verður fagnað með veglegu veisluhaldi laugardaginn 20. september í forsal Salarins. Kvöldið hefst á hátíðarkvöldverði í boði Króníkunnar þar sem bragðlaukarnir fá sín notið, en ljúffengur matur verður borinn fram í sérstaklega skreyttum forsal, hönnuðum af Birni Loka hjá Krot & Krass og FÚSK, í tilefni hátíðarinnar. Undir borðhaldinu verða lifandi skemmtiatriði sem spegla kjarna hátíðarinnar, kveðskapur og tónlist milli þess sem skálað er.

Eftir borðhald hefst dansleikur þar sem fremstu danstónlistarmenn Noregs halda uppi ómótstæðilegum hrynþokka fyrir bæði hreyfanlega og óhreyfanlega gesti, og lýkur kvöldinu á DJ setti með þjóðlistabræðingi.

Komið og fagnið – þetta verður ógleymanlegur endir á VÖKU 2025!

VAKA þjóðlistahátíð 2025 fagnar lifandi hefðum dagana 15. - 21. september með fjölbreyttum viðburðum fyrir alla fjölskylduna. Á VÖKU 2025 verður í boði að hlýða á marga helstu kvæðamenn Íslands, fræðast og njóta þjóðlagatónlistar frá Íslandi og Noregi, kynna sér nýútgefin íslensk dans- og sönglög frá 19. öld, kynna sér íslenskt handverk fyrri alda sem og sækja erindi og fjölbreyttar vinnustofur um íslenska ljóðlist, íslenskt handverk, þjóðdansa, hljóðfæraleik og danstónlist frá Íslandi, Noregi og Kólumbíu. Boðið verður upp á fjölbreytta samveru í formi samsöngs, dans og samspils, og í lok hátíðar verður haldið málþing um alþýðuhljóðfæraleik í Reykjavík á fyrri öldum.

Allar upplýsingar um hátíðina má finna á vakareykjavik.is og á samfélagsmiðlum Vökufélagsins.