Kvöldið er fagurt í Eyvindartungu! Komdu og njóttu kvöldsólarinnar á tónleikum með Svavari Knúti.

Söngvaskáldið fagnar þessa dagana sumrinu með tónleikum og ferðalögum um landið þvert og endilangt og kemur meðal annars við í Eyvindartungu, við Laugarvatn, þar sem hann heldur tónleika í Hlöðunni, 26. júní næstkomandi.

Á síðasta ári komu út nýjasta plata Svavars, Ahoy! Side B, ásamt tvöföldum vínyl, þar sem Side B rennur saman við systurplötu sína Ahoy! Side A, sem kom út 2018, en Svavar Knútur hlaut tilnefningar til íslensku tónlistarverðlaunanna fyrir báðar hliðar. Loksins sameinaðar! Þetta er lokahluti meir en 15 ára verkefnis Svavars Knúts um sorgarferlið með öllum tilheyrandi hólum og hæðum, dimmu dölum og björtu stjörnum og alls kyns gúmmelaði þar á milli.

Á tónleikunum mun Svavar Knútur syngja lög vítt og breitt af ferli sínum og segja sögur af ferðlögum, löndum og lýðum. Börn eru auðvitað velkomin í fylgd með foreldrum.

Ókeypis er fyrir börn og unglinga undir 18 ára í fylgd með foreldrum eða afa/ömmu

Öll innkoma af veitingasölu rennur óskipt til styrktar fjölskyldu Víglundar Þorsteinssonar, er lést af slysförum í lok maí.