Sinfóníuhljómsveit Íslands

Hljómsveitarstjóri: Sir James MacMillan

Einleikari: Jón Arnar Einarsson

Efnisskrá

Bára Gísladóttir Dægrin – frumflutningur

Sir James Macmillan Básúnukonsert

Kjartan Sveinsson Nýtt Verk – frumflutningur

Snorri Sigfús Birgisson Konsert nr. 2 fyrir hljómsveit

Á tónleikum Sinfóníuhljómsveitar Íslands á Myrkum músíkdögum verða frumflutt tvö ný íslensk tónverk, eftir þau Báru Gísladóttur og Kjartan Sveinsson.

Ferill Báru er á mikilli uppleið og hefur hún hlotið fjölda verðlauna og viðurkenninga fyrir tónsköpun sína. Nú síðast hlaut hún heiðurs verðlaun Carls Nielsen og Anne Marie Carl-Nielsen, ein virtustu menningarverðlaun sem veitt eru í Danmörku. Kjartan Sveinsson hefur fyrir löngu öðlast viðurkenningu sem ótrúlega fjölhæfur tónlistarmaður og tónskáld, fyrst sem einn af forsprökkum hljómsveitarinnar Sigur Rósar en einnig fyrir tónsmíðar sínar sem fluttar hafa verið víða. Kjartan hefur unnið náið með myndlistarmanninum Ragnari Kjartanssyni, leikstjóranum Rúnari Rúnarssyni og fjölda annarra. Sinfóníuhljómsveit Íslands flutti m.a. Stríð, verk þeirra Ragnars og Kjartans, á sýningu í Þjóðleikhúsinu árið 2018. Á tónleikunum verður einnig fluttur hljómsveitarkonsert nr. 2 eftir Snorra Sigfús Birgisson en konsertinn hlaut Íslensku tónlistarverðlaunin sem tónverk ársins 2024.

Skoska tónskáldið Sir James MacMillan er hljómsveitarstjóri tónleikanna en óhætt er að fullyrða að hann sé eitt þekktasta tónskáld samtímans. Sinfóníuhljómsveitin hefur flutt nokkur verka hans í áranna rás en á þessum tónleikum hljómar básúnukonsert hans frá árinu 2017. Einleikari í þessum krefjandi en áhrifamikla einleikskonsert er leiðari básúnudeildar hljómsveitarinnar, Jón Arnar Einarsson.

Tónlistarhátíðin Myrkir músíkdagar er ein elsta tónlistarhátíð landsins, stofnuð árið 1980 af Tónskáldafélagi Íslands og hefur Sinfóníuhljómsveit Íslands verið þátttakandi á hátíðinni frá upphafi.