Sinfóníuhljómsveit Íslands

Hljómsveitarstjóri: Tomáš Hanus

Einleikari: Stefán Ragnar Höskuldsson

Efnisskrá

Jón Nordal Adagio

Lowell Liebermann Flautukonsert nr. 2

Antonín Dvorák Svíta í A-dúr

Bohuslav Martinu Sinfónía nr. 6

Það voru stórfréttir í íslensku tónlistarlífi í mars síðastliðnum þegar tilkynnt var að Stefán Ragnar Höskuldsson hefði verið valinn til að gegna stöðu fyrsta flautuleikara hjá Fílharmóníusveit Berlínar. Því er það mikið gleðiefni að þessi stórkostlegi tónlistar maður komi nú hingað heim til að leika einleik með Sinfóníuhljómsveit Íslands. Flautukonsertinn sem Stefán flytur með hljómsveitinni var saminn sérstaklega fyrir hann og Stefán frumflutti í mars 2024 ásamt Sinfóníuhljómsveitinni í Chicago. Tónmál konsertsins, sem er eftir Lowell Liebermann, er einkar glæsilegt og aðgengilegt, en í einleikspartinum eru miklar kröfur gerðar til flautuleikarans.

Hinn tékkneski Tomáš Hanus, aðalgestastjórnandi Sinfóníuhljómsveitar Íslands, stjórnar að auki tónlist eftir tvo landa sína í síðari hluta tónleikanna. Svítan eftir Dvorák er yfirleitt kölluð „hin ameríska“ enda var hún samin í heimsborginni New York, þar sem áhrif bandarískrar tónlistar og tónlistar frá heimaslóðum tónskáldsins blandast fallega saman.

Sjötta sinfónía annars tékknesks tónskálds, Bohuslav Martinu, er sérlega glæsilegt tónverk, litríkt og óvenjulegt í formi og útsetningu fyrir hljómsveit. Sinfónían er nú flutt í fyrsta sinn á tónleikum hér á landi.

Tónleikarnir hefjast á hinu áhrifaríka Adagio fyrir flautu, píanó, hörpu og strengi eftir Jón Nordal sem var lykilverk á tónsmíðaferli Jóns. Í mars 2026 verða 100 ár liðin frá fæðingu tónskáldsins sem lést í desember 2024.