Sinfóníuhljómsveit Íslands

Hljómsveitarstjóri: Dima Slobodeniouk

Einleikari: Martin Helmchen

Efnisskrá

Claude Debussy Forleikur að Síðdegi skógarpúkans

Béla Bartók Píanókonsert nr. 3

Witold Lutoslawski Sinfónía nr. 4

Maurice Ravel La valse

Á þessum tónleikum Sinfóníuhljómsveitar Íslands leiða tveir framúrskarandi listamenn áheyrendur í gegnum í efnisskrá þar sem tónlist fjögurra frumkvöðla 20. aldarinnar verður leikin. Á fyrri hluta tónleikanna er teflt saman seiðandi og litfögrum tónum Debussys gegn þjóðlegri og hrynsterkari tónlist Béla Bartóks. Eftir hlé tekur við djarfur en fágaður stíll Lutoslawskis í síðustu sinfóníu hans og tónleikunum lýkur svo á hinni ljóðrænu en ástríðufullu túlkun Ravels á Vínarvalsinum.

Þýski píanóleikarinn Martin Helmchen er einn eftirsóttasti píanó leikari samtímans. Næm túlkun og blæbrigðarík tónmyndun ásamt óaðfinnanlegri tækni hefur fleytt honum á svið með helstu sinfóníuhljómsveitum heims og verður spennandi að heyra hann spreyta sig á einleikshlutverkinu í 3. píanókonserti Bartóks. Finnski hljómsveitarstjórinn Dima Slobodeniouk heldur á tónsprotanum á þessum tónleikum en hann á það sameiginlegt með einleikaranum að stíga reglulega á svið með þekktustu hljómsveitum heims líkt og Sinfóníuhljómsveitum Lundúna og Boston og Fílharmóníusveitum Berlínar og New York.