Sinfóníuhljómsveit Íslands

Hljómsveitarstjóri: Jukka-Pekka Saraste

Einleikari: Francesco Piemontesi

Efnisskrá: Sergei Rakhmanínov Píanókonsert nr. 3

Anton Bruckner Sinfónía nr. 6

Hinn þekkti stjórnandi Jukka-Pekka Saraste stjórnar Sinfóníuhljómsveit Íslands á þessum tónleikum með verkum eftir Rakhmanínov og Bruckner.Píanókonsert nr. 3 í d-moll eftir Rakhmanínov er einn þekktasti píanókonsert sögunnar og eftirlæti tónlistarunnenda um heim allan. Hann er talinn einn mest krefjandi konsert sem píanóleikari getur tekist á við, jafnt tæknilega sem tilfinningalega. Konsertinn er hlaðinn hrífandi ljóðrænni tjáningu, stórbrotnum hápunktum og nær ókleifum áskorunum í leiktækni. Svissnesk-ítalski píanóleikarinn Francesco Piemontesi er orðinn vel þekktur á tónleikasviðinu víða um heim og hefur unnið með mörgum helstu hljómsveitum og stjórnendum samtímans. Einn þeirra er stjórnandi þessara tónleika, Jukka-Pekka Saraste, aðalstjórnandi hinnar virtu Fílharmóníusveitar í Helsinki. Saraste hefur stjórnað helstu hljómsveitum hins vestræna heims og túlkun hans á hljómsveitarverkum síðrómantíkurinnar hefur hvarvetna vakið athygli. Sjötta sinfónía Bruckners þykir einstök í höfundarverki Bruckners fyrir tilfinningaríka úrvinnslu stefja, fjölbreytta hljómræna framvindu og flókna hrynjandi.