Um viðburðinn

Goya með eyrum Granados: Tonadillas al estilo antiguo

– Spænskir ljóðatónleikar um ástir, endurgoldnar og vanmetnar.

Í ljóðaflokknum Tonadillas mynda ellefu lög eitt verk. Líkt og málverk á málverkasýningu veita þau innsýn í augnablik, stundir og uppgötvanir og mynda heild án þess kannski að segja alla þá sögu sem tengja þau saman. Ástir, löngun, fegurð og aðdáun.

Enrique Granados, eitt fremsta tónskáld Spánverja, er þekktastur fyrir verk sín sem sækja innblástur í heim spænska listmálarans Goya.  Píanósónöturnar Goyeskurnar, óperan og ljóðaflokkurinn Tonadillas túlka í tónum og orðum mynd- og reynsluheim Goya.

Það er spennandi að fylgjast með því hvernig litir verða að tónum og hvernig sögur verða til, þegar að saga er sögð oftar en einu sinni.

Verkið er flutt af söngkonunni og sögumanninum Svanlaugu Jóhannsdóttir og píanóleikaranum Einari Bjarti Egilssyni.

Svanlaug flutti aftur frá Spáni fyrir rúmu ári. Þar söng Svanlaug reglulega með stórri hljómsveit í Talavera de la Reina. Hún sótti söngþjálfun hjá mezzó-sópraninum Alicia Nafé sem prýtt hefur helstu svið klassískrar tónlistar. Stíll Svanlaugar blandar þó aðeins saman klassískum söng og þjóðlagatónlist. www.svana.live

Hún lauk mastersnámi frá LHÍ í „Sköpun, miðlun og frumkvöðlastarfi“. Notar augnabliksáhrif tónlistar og sagna til að slíta raunveruleikann úr samhengi og ná inn í sálartetur áhorfandans. Þar hvetur hún áhorfandann til sköpunargleði án hafta og til persónulegs vaxtar.