Um viðburðinn

Óperan Évgení Onegin eftir Pjotr Tchaikovsky er byggð á samnefndri skáldsögu í ljóðum eftir þjóðskáld Rússlands, Alexander Púshkin. Óperan hefur notið gríðarlegrar vinsælda í heimalandi sínu, þar sem hún hefur verið sýnd samfellt frá því að hún var frumflutt árið 1879 í Moskvu. Évgení Onegin er sú rússneska ópera sem nýtur mestrar hylli utan Rússlands og er reglulega sett upp í óperuhúsum um heim allan enda rómantísk saga og tónlist eins og best verður á kosið.

Hinn glæsilegi en lífsleiði aðalsmaður Évgení Onegin kemur í heimsókn á óðalssetur frú Larinu og dætra hennar, Tatjönu og Olgu. Hjá Tatjönu verður það ást við fyrstu sýn, þarna er kominn hin sanna hetja sem hún elskar og les um í skáldsögum. Onegin hafnar henni með afar kuldalegum hætti. Honum leiðist í sveitinni og fer að daðra við systur Tatjönu, en hún er trúlofuð Lenskí – sem er vinur Onegins. Lenskí er mjög misboðið og skorar Onegin á hólm þar sem hinn síðarnefndi drepur eina vin sinn. Onegin leggst í ferðalög til þess að reyna að flýja sekt sína, en snýr aftur til Rússlands bugaður maður. Hann kemst að því að Tatjana er þá gift Gremin prins og er hátt metin hjá aðlinum í Pétursborg. Onegin sér að sér og grátbiður Tatjönu um ást sína. Þrátt fyrir að ást hennar til Onegins sé enn eldheit, þá er Tatjana trú eiginmanni sínum.

„Hamingjan var einu sinni svo nærri, svo nærri“ – Évgení Onegin og Tatjana í 2.þætti

Óperan er flutt á rússnesku með íslenskum og enskum þýðingum varpað á skjá og mun þetta vera í fyrsta sinn sem ópera er flutt á rússnesku á Íslandi.

Hljómsveitarstjóri: Benjamin Levy
Leikstjóri: Anthony Pilavachy
Leikmynd: Eva Signý Berger
Búningar: María Th. Ólafsdóttir

Hlutverk
Évgeni Onegin: Andrey Zhilikhovsky
Tatjana: Þóra Einarsdóttir
Gremin prins: Runi Brattaberg
Vladimir Lenskí: Elmar Gilbertsson
Olga: Nathalía Druzin Halldórsdóttir
Larina, móðir Tatjönu og Olgu: Hanna Dóra Sturludóttir
Filipévna, barnfóstran: Alina Dubik
Monsieur Triquet: Hlöðver Sigurðsson