Um viðburðinn

Ljósmyndasýningin Jazzhátíð Reykjavíkur í myndum verður á jarðhæð Hörpu, dagana 23.-31. ágúst. Þar sýnir ljósmyndarinn Hans Vera ljósmyndir sem hann hefur tekið á hátíðinni allt frá árinu 2009.

Hans Vera er fæddur í Belgíu árið 1967 og hefur verið búsettur á Íslandi frá árinu 1999. Hans hefur frá unga aldri haft mikinn áhuga á tónlist og tónleikum – einkum jazzi. Árið 2009 sá hann að hægt væri að skrá sig sem sjálfboðaliða á Jazzhátíð Reykjavíkur og merkja við ljósmyndun. Það varð upphafið að nánu sambandi hans við íslensku jazzsenuna, sem hann hefur myndað af ástríðu allar götur síðan, sérstaklega á hátíðinni sjálfri.

Áhuginn á ljósmyndun kviknaði árið 2003 þegar Hans keypti sína fyrstu stafrænu myndavél. Upphaflega var landslag hans helsta myndefni, en í dag fangar hann fjölbreyttar senur: landslag, viðburði, götulíf og portrett.

Myndlist hefur alltaf verið honum hugleikin – hann nam hana um árabil í Belgíu og hefur sérstakt yndi af blýantsteikningum, sem hann stundar enn af kappi.