Um viðburðinn

Á þessum tónleikum koma fram Juno Paul, AfterpartyAngel og sameheads

Harpa, í samstarfi við Tónlistarborgina Reykjavík, Rás 2 og Landsbankann, stendur fyrir nýrri tónleikaröð sem tileinkuð er grasrót íslenskrar tónlistar, þvert á tónlistarstefnur. Tónleikaröðin kallast Upprásin og fer fram í Kaldalóni eitt þriðjudagskvöld í mánuði veturinn 2024-2025. Hún fer nú fram annað árið í röð og munu samtals 27 hljómsveitir koma fram, þrjár á hverju tónleikakvöldi.

Tónleikaröðin er liður í því að framfylgja dagskrárstefnu Hörpu um bætt aðgengi grasrótar og ungs fólks í öllum tónlistargreinum og auka við fjölbreytni. Markmiðið er einnig að tónlistaráhugafólk geti gengið að því vísu að heyra fjölbreytta nýja íslenska tónlist, beint úr grasrót tónlistarlífsins, flutta við kjöraðstæður í tónlistarhúsi þjóðarinnar.

Miðaverð er aðeins 2000 kr. en hægt er að leggja til hærri upphæð í miðasöluferlinu sem rennur beint til listafólksins.

• Juno Paul

Juno Paul spilar blöndu af raftónlist og rokki, en hann hefur getið sér gott orðspor innan íslensku grasrótarinnar, þá helst fyrir kraftmikla og í sumum tilvikum hættulega sviðsframkomu. Juno Paul gaf nýverið út plötuna “Gimp” sem hefur notið vinsælda meðal áheyrenda. Í bandinu er auk Juno Paul trommarinn Rósa Kristinsdóttir.

Framúrstefnupoppsveitin AfterpartyAngel er verkefni Elísabetar Birtu Sveinsdóttur, gjörninga- og myndlistarmanns, en hljómsveitin byrjaði sem gjörningaverk þar sem engillinn á jörðinni togast milli andlegs tilgangs og jarðneskra kennda. AfterpartyAngel gaf út myrka elektóník á fyrstu EP plötunni „Death Presence“ árið 2020. Tilraunakennda trip hop platan „Keepers“ kom svo út á Heavy Knife Records 2024, þar sem karakterar tilvistarhyggjunnar, ljúfar kenndir og fortíðarþrá eftir gömlum Disney myndum svífa um einhversstaðar milli himins og heljar.

Hljómsveitin sameheads hafa getið sér gott orð innan íslenskrar tónlistarsenu og koma með sterkt og skemmtilegt nýbylgjurokk inn í flóruna. Þeir gáfu nýverið út sína fyrstu breiðskífu “Tónlykt” hjá Heavy Knife Records við góðar undirtektir og lýsa tónlistinni sem nýbylgjuskotnu rokki með dassi af bulli og rugli.