Um viðburðinn

Söngkonan Guðrún Ýr Eyfjörð og píanóleikarinn Magnús Jóhann Ragnarsson kynntust fyrst í tónlistarskóla FÍH þegar leiðir þeirra lágu saman á ABBA tónleikum á vegum skólans. Síðan þá hafa þau unnið saman að fjölda verkefna.
Guðrún hefur gefið út tvær plötur undir listamannsnafninu GDRN en Magnús hefur einnig gefið út tvær sólóplötur. Auk þess hafa þau komið mikið fram saman undanfarin ár, bæði sem tvíeyki og með hljómsveit.
Undanfarin misseri hafa Guðrún og Magnús unnið að gerð hljómplötu þar sem íslenskar tónlistarperlur eru í forgrunni. Tvíeykið býður tónleikagestum Múlans upp á forsmekkinn af þeirri plötu. Þjóðlög, íslenskar dægurperlur og jafnvel ABBA fyrir tónleikasvelta tónlistarunnendur.

Almennt miðaverð er 3.500 kr. 
Nemendur og eldri borgarar geta keypt miða á 2.000 kr. í miðasölu Hörpu.