Coney Island Babies með félögum úr SinfóAust
Hljómsveitin Coney Island Babies frá Neskaupstað og félagar úr Sinfóníuhljómsveit Austurlands sameina krafta sína á stórtónleikum í félagsheimilinu Egilsbúð í Neskaupstað 8. október. Flutt verða valin lög af hljóðversplötum Coney Island Babies í nýjum útsetningum sem Jón Ólafsson hefur haft veg og vanda af.
Coney Island Babies var stofnuð í febrúar 2004 í Neskaupstað og er ein elsta starfandi hljómsveit Austurlands. Hún hefur gefið út plöturnar Morning to Kill (2012) og Curbstone (2020), báðar aðgengilegar á Spotify, og komið fram á tónlistarhátíðum og tónleikum víða um landið.
Sinfóníuhljómsveit Austurlands var stofnuð 10. maí 2018 á Reyðarfirði af sjö austfirskum hljóðfæraleikurum og fyrstu tónleikar hennar fóru fram þann 1. desember 2018 í Tónlistarmiðstöðinni á Eskifirði.
Þetta er í fyrsta sinn sem félagar í Sinfóníuhljómsveit Austurlands rugla saman reitum við austfirska rokkhljómsveit og því óhætt að tala um tímamótaviðburð í austfirsku menningarlífi.
Fram koma:
Geir Sigurpáll Hlöðversson – söngur, gítar og hljómborð
Guðmundur Höskuldsson - gítar
Jón Hafliði Sigurjónsson - bassi
Jón Knútur Ásmundsson – trommur og slagverk
Rannveig Júlía Sigurpálsdóttir – hljómborð og söngur
Charles Ross – víóla og fiðla
Mairi Louisa – víóla og fiðla
Suncana Slamnig – selló
Guido Baumer - saxófónn
Vigdís Klara Aradóttir – saxófónn
Berglind Halldórsdóttir – klarínett
Páll Ívan frá Eiðum - kontrabassi
Tónleikarnir eru unnir í samstarfi við Menningarstofu Fjarðabyggðar og Tónlistarmiðstöð Austurlands en auk þess njóta þeir stuðnings Uppbyggingarsjóðs Austurlands, sveitarfélagsins Fjarðabyggðar, Sparisjóðs Austurlands og Tónlistarsjóðs Rannís.