Um viðburðinn

Peter Weiss - Marat/Sade 

Bæling og losti, kúgun og uppreisn, hinir jaðarsettu gegn valdinu! Marat/Sade, öðru nafni Ofsóknin og morðið á Jean Paul Marat sýnt af vistmönnum geðveikrahælisins í Charenton undir stjórn De Sade markgreifa, er eitt af öndvegisverkum 20. aldarinnar – marglaga og margslungið í efni og formi. Verkið, sem er eftir þýska leikskáldið Peter Weiss, var fyrst frumsýnt árið 1963 og hefur frá upphafi verið umdeilt og vakið sterk viðbrögð. Hér er leikrit inni í leikriti – vistmenn geðveikrahælisins í Charenton setja á svið verk undir stjórn hins alræmda markgreifa De Sade. De Sade er einnig höfundur leikritsins og sjálfur vistmaður á hælinu. Verkið hverfist um frönsku byltinguna og er þrungið átökum og andstæðum sem endurspeglast í hinum týndu sálum hælisins. Í uppfærslu Lab Loka og Borgarleikhússins á þessu kraftmikla leikriti verður til mögnuð sýning þar sem Nýja sviðið fyllist af mörgum dáðustu en jafnframt elstu listamönnum íslensku þjóðarinnar en þau yngstu eru um sjötugt og þau elstu fast að níræðu. Hér er óhætt að lofa einstakri upplifun og sjónarspili sem seint gleymist.

 Verkefnið er stutt af Reykjavíkurborg og Menningar- og viðskiptaráðuneytinu, bæði úr sviðslistasjóði og launasjóði sviðslistafólks.

Frumsýnt 20. janúar 2023   

Þýðandi: Árni Björnsson
Leikstjórn: Rúnar Guðbrandsson
Leikmynd og búningar: Ingibjörg Jara Sigurðardóttir og Filippía Elísdóttir
Tónlist: Richard Peaslee
Tónlistarstjórn: Guðni Franzson
Lýsing: Arnar Ingvarsson
Plakat: Þorlákur Lúðvíksson
Framleiðsla: Lab Loki og Davíð Freyr Þórunnarson/ MurMur production
Aðstoð við leikstjórn og framleiðslu: Sigrún Gylfadóttir

Leikarar: Arnar Jónsson, Arnfinnur Daníelsson, Árni Pétur Guðjónsson,  Ásgeir Gunnarsson,   Eggert Þorleifsson, Guðmundur Ólafsson, Hanna María Karlsdóttir, Halldóra Harðardóttir, Harald G. Haraldsson, Helga Elínborg Jónsdóttir, Jón Hjartarson, Jórunn Sigurðardóttir, Júlía Hannam, Kristbjörg Kjeld, Margrét Guðmundsdóttir, Sigurður Karlsson, Sigurður Skúlason, Viðar Eggertsson, Þórhallur Sigurðsson, Þórhildur Þorleifsdóttir.

Hljóðfæraleikarar: Reynir Jónasson og Reynir Sigurðsson