Um viðburðinn

Geneva Camerata (GECA) hefur vakið heimsathygli fyrir ferska og nýstárlega nálgun sína við klassíska tónlist. Hljómsveitin kemur fram á sviði Eldborgar í Hörpu, 14. júní 2025 og flytur sýninguna REVOLTA þar sem fléttast saman tónlist Dmitri Shostakovitsj og hiphop dans í magnaðri upplifun.

Á undan sýningunni í Eldborg mun David Greilsammer, hljómsveitarstjóri og listrænn stjórnandi GECA fjalla um sköpunarferlið að baki sýningunni REVOLTA, nýjar leiðir til að nálgast og miðla sígildri tónlist og samruna sinfónískrar tónlistar og hiphop dans svo fátt eitt sé nefnt.

Viðburðurinn fer fram í Hörpuhorni, á annarri hæð Hörpu. Aðgangur er ókeypis og öll velkomin. Viðburðurinn fer fram á ensku. Aðgengi er gott.

_______________

Nánar um David Greilsammer:

David Greilsammer er píanóleikari og hljómsveitarstjóri og hefur verið listrænn stjórnandi Geneva Camerata allt frá stofnun sveitarinnar árið 2013.

David Greilsammer hefur komið fram sem einleikari og stjórnandi með hljómsveitum á borð við Fílharmóníusveit BBC, Sinfóníuhljómsveitina í San Fransisco, Metropolitanhljómsveitina í Tókýó, Fílharmóníusveitina í Hong Kong, Fílharmóníusveit Franska þjóðarútvarpsins og Þjóðarsinfóníuhljómsveitina í Mexíkó og haldið einleikstónleika í tónleikahúsum svo sem í Lincoln Center í New York, Kennedy Center í Washington, Concertgebouw í Amsterdam, Wigmore Hall í Lundúnum, Elbphilharmonie í Hamborg og Théâtre du Châtelet í París. Frá árinu 2022 hefur David Greilsammer verið listrænn stjórnandi Medellín-fílharmóníusveitarinnar í Kólumbíu.

David Greilsammer hefur frá upphafi ferils síns verið vakandi fyrir því að miðla sígildri tónlist sem víðast og opna heim hennar fyrir nýjum áheyrendahópum. Starf hans með Geneva Camerata vitnar um þessa ástríðu; verkefnavalið er nýstárlegt og frumlegt, ólíkum tónlistarstílum og straumum er teflt saman á einum og sömu tónleikunum og frjótt samstarf við listafólk úr fjölbreyttum heimum sviðslista, myndlistar og úr öðrum tónlistargeirum setur tónlistina í nýtt og ögrandi samhengi.

_____________________

Nánar um sýninguna REVOLTA

Kaupa miða á Revolta