Loading…

Regnbogakort Sinfóníuhljómsveitar Íslands

Regnabogakort veitir þér 20% afslátt af miðaverði á tónleika Sinfóníuhljómsveitar Íslands. Góð sæti víðsvegar um Eldborg hafa verið tekin frá fyrir áskifendur Regnbogakorta til að tryggja gott úrval sæta.

Leiðbeiningar:

1. Veldu fjölda korta.
2. Veldu 4-15 tónleika á kortið með því að smella á „Velja tónleika“.
3. Smelltu á „Finna kort” eftir að hafa valið tónleika.
4. Að því loknu er hægt að breyta sætum með því að velja „Skoða sæti”.

Námsmannaafsláttur

Námsmenn, 25 ára og yngri, fá 50% afslátt af Regnbogakorti á verðsvæðum 2 og 3. Athugið að námsmannaafsláttinn er eingöngu hægt að fá í miðasölu Hörpu.

Veldu fjölda áskrifta

Regnbogakort

Yo-Yo Ma leikur Elgar - Sinfóníuhljómsveit Íslands

Sinfóníuhjómsveit Íslands - Eldborg || 24. október 2024

Harpa - Eldborg
Yo-Yo Ma leikur Elgar - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

24. okt. 2024 - fim. 19:30
Sinfóníuhljómsveit Íslands
Eva Ollikainen
hljómsveitarstjóri
Yo-Yo Ma
einleikari
Söngflokkurinn Hljómeyki
Stefan Sand
kórstjóri
Hildur Guðnadóttir
Fact of the Matter
Edward Elgar
Sellókonsert
Ígor Stravinskíj
Petrushka
Bandaríski sellóleikarinn Yo-Yo Ma er einn þekktasti núlifandi hljóðfæraleikari heims og koma hans því sannkallaður stórviðburður í íslensku tónlistarlífi. Hann hefur gefið út yfir 120 hljóðritanir og hlotið Grammy-verðlaunin 19 sinnum, auk fjölda annarra verðlauna. Áhrif hans ná langt út fyrir tónlistarheiminn en hann hefur um áratugaskeið nýtt tónlistina í baráttu fyrir friði og samvinnu og hefur til að mynda verið einn af friðarsendiboðum Sameinuðu þjóðanna frá árinu 2006.
Á þessum tónleikum leikur Yo-Yo Ma hinn áhrifamikla sellókonsert Elgars með Sinfóníuhljómsveit Íslands undir stjórn Evu Ollikainen, aðalhljómsveitarstjóra sveitarinnar. Verkið var samið skömmu eftir lok heimsstyrjaldarinnar fyrri og felur í sér sáran söknuð eftir liðnum tíma. Konsertinn er margbrotin flétta sigurs og sorgar, ljóðrænu og ómstríðu - eins konar trúarjátning til listarinnar frammi fyrir eyðileggingu stríðsins.
Fact of the Matter eftir Hildi Guðnadóttur var frumflutt á BBC Proms tónlistarhátíðinni árið 2022. Hildur hefur sagt verkið vera viðbragð við þeirri sundrung sem ríkir milli fólks í veröld þar sem allir hafa sína eigin skoðun á staðreyndum. „Við erum í afturför og í stað þess að taka höndum saman virðumst við hafa meiri áhuga á viðurkenningu þess að við höfum rétt fyrir okkur,“ sagði Hildur í viðtali eftir frumflutninginn. Tónleikunum lýkur með svítum Stravinskíjs úr ballettinum Petrushku. Petrushka er ómótstæðilega skemmtilegur ballett þar sem heyra má í mótun þá kraftmiklu höfundarrödd Stravinskíjs sem síðar átti eftir að umbylta tónlistarsögunni til frambúðar.
24. okt. 2024 - fim. 19:30
Yo-Yo Ma og Kathryn Stott - Dúó tónleikar

Sinfóníuhjómsveit Íslands - Eldborg || 26. október 2024

Harpa - Eldborg
Yo-Yo Ma og Kathryn Stott - Dúó tónleikar

Áskrift - Regnbogakort Sinfóníuhljómsveitar Íslands 2024/25:

26. okt. 2024 - lau. 20:00
Yo-Yo Ma selló
Kathryn Stott
píanó
Gabriel Fauré
Berceuse
Antonín Dvorák
Songs My Mother Taught Me
Sérgio Assad
Menino
Nadia Boulanger
Cantique
Gabriel Fauré
Papillon
Dmitríj Shostakovitsj
Sónata fyrir selló og píanó í d-moll
Arvo Pärt
Spiegel im Spiegel
César Franck
Sónata í A-dúr fyrir fiðlu og píanó
Yo-Yo Ma er einn þekktasti sellóleikari samtímans. Hann hefur á löngum og glæsilegum ferli hrifið áheyrendur um allan heim með heillandi túlkun sinni, óaðfinnanlegri tækni og miklum persónutöfrum, auk hinnar brennandi ástríðu sem hann hefur fyrir tónlistinni og mætti hennar til að koma góðu til leiðar í heiminum. Eftir tónleika Ma með Sinfóníuhljómsveit Íslands gefst áheyrendum hér einstakt tækifæri til að kynnast hinni hliðinni á þessum einstaka tónlistarmanni þar sem hann leikur litríka og hrífandi efnisskrá fyrir selló og píanó með samstarfskonu sinni til margra ára, Kathryn Stott. Stott er þekkt um allan heim sem einn hugmyndaríkasti og fjölhæfasti píanóleikari Breta, og hefur Washington Post haft á orði að hún sé „jafnoki Yo-Yo Ma og leiki á píanóið með eftirtektarverðum sérkennum.” Yo-Yo Ma og Kathryn Stott hafa átt farsælt samstarf um árabil, leikið saman á fjölda tónleika og sent frá sér verðlaunaðar hljóðritanir. Þessir tónleikar eru hluti af yfirstandandi tónleikaferðalagi þeirra þar sem þau leika í mörgum af helstu tónleikasölum heims, til dæmis í Barbican Centre, Konserthuset í Stokkhólmi, Fílharmóníunni í Berlín, Herkulessal í München og Fílharmóníunni í París. Þau hafa einnig haldið tónleika í þekktustu tónleikahúsum heims eins og Walt Disney Hall í Los Angeles og Carnegie Hall í New York.
Verkin á efnisskrá þessa óviðjafnanlega dúós spanna allt frá nítjándu öldinni til þeirrar tuttugustu og fyrstu. Þar er meðal annars að finna hina tilfinningaþrungnu sellósónötu Dmitríj Shostakovitsj og hina hrífandi fögru fiðlusónötu Césars Franck leikna á selló. Þá hljóma nokkur yndisfögur og íhugul smáverk í útsetningum fyrir selló og píanó
26. okt. 2024 - lau. 20:00
Barokkveisla - Sinfóníuhljómsveit Íslands

Sinfóníuhjómsveit Íslands - Eldborg || 31. október 2024

Harpa - Eldborg
Barokkveisla - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

31. okt. 2024 - fim. 19:30
Sinfóníuhljómsveit Íslands
Peter Hanson
hljómsveitarstjóri og fiðluleikari
María Konráðsdóttir
einsöngvari
Hildegard von Bingen
O Frondens Virga (úts. Nicolai Mathews)
Antonio Vivaldi
Konsert fyrir fjórar fiðlur
Georg Friedrich Händel
Flammende Rose, úr Níu þýskum aríum
Se pietà di me non sente, úr Giulio Cesare
Ombra mai fu, úr Serse
Johann Sebastian Bach
Brandenborgarkonsert nr. 6
Jean-Philippe Rameau
Entrée de Polymnie, úr Les Boréades (úts. Peter Hanson)
Les Sauvages, úr Les Indes Galantes (úts. Peter Hanson)
Tendre Amour, úr Les Indes Galantes (úts. Peter Hanson)
Arcangelo Corelli
Concerto Grosso op. 6 nr. 4
Georg Friedrich Händel
Tornami a vagheggiar, úr Alcina
Tónlistarfjársjóður barokktímans geymir fjölmarga dýrgripi sem heilla sérhverja nýja kynslóð. Enn í dag er tónlistarfólk að uppgötva snilldarverk frá sautjándu og átjándu öld sem reynast ný og fersk í eyrum áheyrenda samtímans, rétt eins og þau sígrænu öndvegisverk Vivaldis, Händels, Bachs og Corellis sem hljóma í þessari barokkveislu Sinfóníuhljómsveitar Íslands.
Einsöngvari á tónleikunum er María Konráðsdóttir sópran, sem hlotið hefur mikið lof fyrir bjarta, tæra og forkunnarfagra rödd samhliða fágaðri en tjáningarríkri túlkun. Hér syngur María litríkar og leikandi aríur úr óperum Händels. Á tónleikunum verða einnig flutt verk eftir Ramau auk miðaldaverksins O Frondens Virga eftir Hildegard von Bingen, en Von Bingen stofnaði sitt eigið Benediktínaklaustur um 1150 þar sem hún samdi fjölda verka sem heillað hafa lærða og leika á seinni öldum.
Það er breski fiðluleikarinn og hljómsveitarstjórinn Peter Hanson sem leiðir hljómsveitina á þessum tónleikum, en Hanson hefur um langt árabil helgað sig upprunaflutningi barokktónlistar - aðferð sem miðar að því að fanga anda tónlistarinnar eins og hún hljómaði á sínum tíma. Hanson hefur starfað sem konsertmeistari í hinni víðfrægu hljómsveit Johns Eliots Gardiner, Orchestre Revolutionnaire et Romantique, í aldarfjórðung. Hann kemur víða fram með þekktum hljómsveitum, ýmist sem einleikari, konsertmeistari eða hljómsveitarstjóri - jafnvel allt þrennt í senn.
31. okt. 2024 - fim. 19:30
Ottensamer stjórnar blásarasveitinni - Föstudagsröð Sinfóníuhljómsveitar Íslands

Sinfóníuhjómsveit Íslands - Norðurljós || 1. nóvember 2024

Harpa - Norðurljós
Ottensamer stjórnar blásarasveitinni - Föstudagsröð Sinfóníuhljómsveitar Íslands

Áskrift - Regnbogakort Sinfóníuhljómsveitar Íslands 2024/25:

01. nóv. 2024 - fös. 18:00
Sinfóníuhjómsveit Íslands
Andreas Ottensamer
hljómsveitarstjóri
Blásarar úr Sinfóníuhljómsveit Íslands
Richard Strauss
Serenaða fyrir blásara, op. 7
Ígor Stravinskíj
Oktett fyrir blásara
Richard Strauss
Sonatina nr. 1
Á þessum föstudagstónleikum láta blásarar Sinfóníuhljómsveitar Íslands ljós sitt skína í þremur ólíkum og hrífandi verkum fyrir blásarasveit. Tvö þeirra eru eftir Richard Strauss, en faðir hans, Franz Strauss, var með færustu hornleikurum sinnar tíðar. Áhuginn á fallegri blásaratónlist var hinum unga Richard Strauss þannig í blóð borinn og margir telja að yndisfagrar laglínurnar í Serenöðunni op. 7 séu innblásnar af sérlega listfengum hornleik föður hans, en verkið samdi Strauss aðeins 17 ára. Sonatina nr. 1 var á hinn bóginn samin meira en sex áratugum síðar, þegar Richard Strauss var á áttræðisaldri og að jafna sig á alvarlegum veikindum. Það var með vísan til þeirra aðstæðna sem hann gaf verkinu hinn gamansama undirtitil „Af verkstæði vesalingsins“. Verkið er uppfullt af þokkafullri gamansemi, angurværð og andagift - verk listamanns sem þrátt fyrir heilsuleysið var auðheyrilega enn í toppformi sem tónskáld. Oktett Ígors Stravinskíjs fyrir blásara markar upphaf þess sem kallað hefur verið nýklassíska tímabil tónskáldsins, en margir urðu furðu lostnir þegar þessi tónlistarlegi byltingarmaður og höfundur Vorblóts tók óvænta beygju á ferli sínum og fór að finna frumlegum hugmyndum sínum farveg í fáguðum formum klassíska tímans. Það er ekki síst heillandi togstreita hins gamla og nýja sem ljær þessu stórskemmtilega verki töfra sína.
Stjórnandi á tónleikunum er Andreas Ottensamer, leiðandi klarinettuleikari Fílharmóníusveitar Berlínar til margra ára, sem á síðustu árum hefur einnig getið sér gott orð sem hljómsveitarstjóri.
01. nóv. 2024 - fös. 18:00
Mozart og Beethoven með Sunwook Kim - Sinfóníuhljómsveit Íslands

Sinfóníuhjómsveit Íslands - Eldborg || 14. nóvember 2024

Harpa - Eldborg
Mozart og Beethoven með Sunwook Kim - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

14. nóv. 2024 - fim. 19:30
Sinfóníuhljómsveit Íslands
Sunwook Kim
hljómsveitarstjóri og einleikari
Fanny Mendelssohn
Forleikur í C-dúr
Wolfgang Amadeus Mozart
Píanókonsert nr. 21
Ludwig van Beethoven
Sinfónía nr. 4
Píanókonsertar Mozarts eru einstakir í tónlistarsögunni. Þeir eru meðal persónulegustu verka Mozarts og í þeim náði hann áður óþekktum hæðum í andagift, frumleika og hugmyndaauðgi. Um leið mótaði hann hugmyndir manna um hvað píanókonsertinn væri fær um, skapaði þá frummynd sem Beethoven og aðrir sem á eftir komu litu til þegar þeir reyndu sig við formið. Á þessum tónleikum hljómar einn dáðasti píanókonsert Mozarts, númer 21 í C-dúr. Sá konsert býr yfir einstakri heiðríkju og öðlaðist gífurlegar vinsældir seint á tuttugustu öld eftir að þokkafullur hægi kaflinn fékk að hljóma í sænsku kvikmyndinni Elviru Madigan árið 1967. Það er suður-kóreski píanóleikarinn Sunwook Kim sem leikur á píanóið en hann stjórnar auk þess hljómsveitinni sjálfur frá flyglinum, rétt eins og Mozart gerði þegar hann frumflutti verkið í Vínarborg 1785.
Sunwook Kim hefur fyrir löngu skipað sér sess sem einn af fremstu píanóleikurum sinnar kynslóðar, en hann sigraði hina virtu Alþjóðlegu píanókeppni í Leeds árið 2006 aðeins 18 ára gamall og var þar með yngsti sigurvegari hennar í 40 ár. Hann kemur reglulega fram með mörgum af fremstu sinfóníuhljómsveitum heims en leggur nú jöfnum höndum stund á píanóleik og hljómsveitarstjórn. Í mars 2023 kom hann í fyrsta sinn fram með Sinfóníuhljómsveit Íslands og hreif þá tónleikagesti í Eldborg með sér í öðrum píanókonserti Brahms undir stjórn Bertrands de Billy. Fjórða sinfónía Beethovens hefur í gegnum tíðina staðið í skugga hinna átakameiri sinfónía sem standa hvor sínum megin við hana í röðinni — Hetjuhljómkviðunni og Örlagasinfóníunni.
Fjórða sinfónían er hins vegar geysisnjallt og hrífandi skemmtilegt verk. Hún er styttri og fíngerðari í forminu en systurverk hennar og horfir um margt aftur til Haydns, læriföður Beethovens, til að mynda með hinum sprellfjöruga og gamansama lokakafla. Verkið átti enda eftir að vekja aðdáun síðari tíma tónskálda á borð við Hector Berlioz, Felix Mendelssohn og Robert Schumann.
Þótt Fanny Mendelssohn hafi látið eftir sig um 500 tónverk um ævina voru fæst þeirra opinberlega flutt eða gefin út meðan hún lifði, þó eitt og eitt rataði ef til vill á prent undir nafni bróður hennar. Tónleikarnir hefjast á eina verki hennar sem varðveitt er fyrir fullskipaða sinfóníuhljómsveit, hinum bjarta og glaðlega konsertforleik í C-dúr
14. nóv. 2024 - fim. 19:30
Beethoven og Shostakovitsj - Sinfóníuhljómsveit Íslands

Sinfóníuhjómsveit Íslands - Eldborg || 21. nóvember 2024

Harpa - Eldborg
Beethoven og Shostakovitsj - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

21. nóv. 2024 - fim. 19:30
Sinfóníuhljómsveit Íslands
Andris Poga
hljómsveitarstjóri
Jan Lisiecki
einleikari
Ludwig van Beethoven
Píanókonsert nr. 4
Dmitríj Shostakovitsj
Sinfónía nr. 8
Pólsk -kanadíski píanóleikarinn Jan Lisiecki hefur verið í fremstu röð píanóleikara heimsins um árabil og er íslenskum tónleikagestum að góðu kunnur, en á síðustu árum hefur hann leikið píanókonserta Schumanns (2018) og Chopins (2022) með Sinfóníuhljómsveit Íslands við mikinn fögnuð áheyrenda og gagnrýnenda. Á þessum tónleikum leikur hann fjórða píanókonsert Beethovens, stórbrotið verk sem geymir jafnt óviðjafnanlega virtúósísk píanóskrif og djarflegar formrænar nýjungar, að ógleymdri þeirri upphöfnu fegurð og innilegu tjáningu sem skýrir ekki síst vinsældir þess meðal tónlistarunnenda um allan heim.
Sinfónía nr. 8 eftir Shostakovitsj var frumflutt í Moskvu 1943, í miðri heimsstyrjöld. Hún er stór í sniðum og tilfinningalega áhrifamikil, en tónskáldið lýsti henni sem eins konar þjáningaróði, tilraun til þess að spegla hinn ógurlega sársauka sem stríðið hafði í för með sér. Shostakovitsj átti í stormasömu sambandi við yfirvöld í Moskvu þar sem hann var ekki alltaf reiðubúinn til þess að fylgja þeirri hugmyndafræði sem þau boðuðu. Áttunda sinfónían er á meðal þeirra sem lentu á bannlista yfirvalda, þar sem tónskáldið þótti hafa gerst sekt um formræna úrkynjun.
Hljómsveitarstjórinn Andris Poga stjórnar nú Sinfóníuhljómsveit Íslands í fyrsta sinn. Auk þess að koma fram sem gestastjórnandi með mörgum af fremstu hljómsveitum heims er Poga aðalhljómsveitarstjóri Sinfóníuhljómsveitarinnar í Stavanger, en var áður aðalhljómsveitarstjóri lettnesku þjóðarhljómsveitarinnar.
21. nóv. 2024 - fim. 19:30
Home Alone - Bíótónleikar - Sinfóníuhljómsveit Íslands

Sinfóníuhjómsveit Íslands - Eldborg || 5. og 6. desember 2024

Harpa - Eldborg
Home Alone - Bíótónleikar - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

05. des. 2024 - fim. 19:00

06. des. 2024 - fös. 19:00
Sinfóníuhljómsveit Íslands
John Williams
tónlist
Chris Columbus
leikstjóri
Caleb Young
hljómsveitarstjóri
Kór Menntaskólans við Hamrahlíð
Kammerkórinn Huldur
Hreiðar Ingi Þorsteinsson
kórstjóri
Sinfóníuhljómsveit Íslands flytur töfrandi og æsispennandi tónlist John Williams þegar sýnd verður uppáhalds jólamynd margra kynslóða, Aleinn heima eða Home Alone. Macaulay Culkin leikur Kevin McCallister, 8 ára snáða sem er óvart skilinn eftir heima þegar fjölskylda hans heldur í jólafríið með þeim afleiðingum að Kevin neyðist til að verja heimilið gegn tveimur seinheppnum þjófum. Home Alone er stórskemmtileg og hjartnæm kvikmynd, sannkölluð hátíðarskemmtun fyrir alla fjölskylduna.
© 1990 Twentieth Century Fox
Jólatónleikar Sinfóníunnar

Sinfóníuhjómsveit Íslands - Eldborg || 14. og 15. desember 2024

Harpa - Eldborg
Jólatónleikar Sinfóníunnar

Áskrift - Regnbogakort Sinfóníuhljómsveitar Íslands 2024/25:

14. des. 2024 - lau. 14:00

14. des. 2024 - lau. 16:00

15. des. 2024 - sun. 14:00

15. des. 2024 - sun. 16:00
Sinfóníuhjómsveit Íslands
Hjörtur Páll Eggertsson
hljómsveitarstjóri
Trúðurinn Barbara
kynnir
Ragnheiður Gröndal
Benedikt Kristjánsson
einsöngvarar
Kolbrún Völkudóttir
einsöngur á táknmáli
Stúlknakór Reykjavíkur og Kammerkórinn Aurora
Bjöllukórar Tónlistarskóla Reykjanesbæjar og Tónstofu Valgerðar
Dansarar úr Listdansskóla Íslands
Langspilssveit Flóaskóla
Táknmálskórinn Litlu sprotarnir
Jólatónleikar Sinfóníuhljómsveitar Íslands eru tilvaldir fyrir jólabörn á öllum aldri. Tónleikarnir eru hátíðlegir að vanda og með dálítið þjóðlegu ívafi að þessu sinni þar sem íslenskar þjóðvísur mæta sígildum jólalögum og töfrandi tónlistarævintýrum, uppfullum af jólaanda. Nýr jólaforleikur prýddur íslenskum og erlendum þjóðlögum opnar dagskrá tónleikanna og söngvararnir Ragnheiður Gröndal, Benedikt Kristjánsson og Kolbrún Völkudóttir flytja fallegar jólaperlur. Kórarnir, ásamt dönsurum, flytja valda þætti úr Snjókarlinum, töfrandi jólaævintýri um vináttuna, eftir Howard Blake. Bjöllukórarnir sameina krafta sína í laginu Hátíð fer að höndum ein og Langspilssveitin strammar sjálft þjóðarhljóðfærið af miklum þrótti.
Kynnir á tónleikunum er trúðurinn Barbara, besta vinkona Halldóru Geirharðsdóttur leikkonu, sem kemur öllum í sannkallað hátíðarskap.
Tónleikarnir eru túlkaðir á táknmáli.
Vínartónleikar Sinfóníunnar - Sinfóníuhljómsveit Íslands

Sinfóníuhjómsveit Íslands - Eldborg || 9., 10. og 11. janúar 2025

Harpa - Eldborg
Vínartónleikar Sinfóníunnar - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

09. jan. 2025 - fim. 19:30

10. jan. 2025 - fös. 19:30

11. jan. 2025 - lau. 16:00

11. jan. 2025 - lau. 19:30
Sinfóníuhljómsveit Íslands
Ville Matvejeff
hljómsveitarstjóri

Bryndís Guðjónsdóttir
einsöngvari

Einar Dagur Jónsson
einsöngvari

Hinir sívinsælu Vínartónleikar eru sannkölluð nýársveisla og sú glaðværa tónlist sem þar hljómar gefur tóninn fyrir nýtt ár. Tónleikarnir hafa lengi verið allra vinsælustu tónleikar hljómsveitarinnar og eitthvað sem tónlistarunnendur vilja ekki láta fram hjá sér fara.

Sem endranær stíga á svið tveir glæsilegir einsöngvarar og syngja aríur og dúetta úr vinsælum óperettum, en að þessu sinni eru það þau Bryndís Guðjónsdóttir sópran og tenórinn Einar Dagur Jónsson. Auk þeirra koma fram á tónleikunum glæsilegir dansarar að vanda, enda ómótstæðilegir valsar, polkar og galopp á efnisskránni — sígild Vínartónlist sem kemur öllum í gott skap.

Sópransöngkonan Bryndís Guðjónsdóttir hefur unnið til fjölda verðlauna, komið fram á fjölum óperuhúsa og með ýmsum sinfóníuhljómsveitum, svo sem í Kiel, Kassel, Stuttgart, München, Salzburg, Prag, Róm, Vilnius, Sevilla og Madrid. Hún hefur áður komið fram með Sinfóníuhljómsveit Íslands, nú síðast á tónleikum sveitarinnar helguðum verkum Önnu Þorvaldsdóttur í október 2023.

Efnisskrá Bryndísar er breið og spannar margar aldir, en hún lauk bæði bakkalárs- og meistaragráðu með láði frá Mozarteum tónlistarháskólanum í Salzburg.

Einar Dagur Jónsson tenór er fæddur 1996. Hann hóf söngnám árið 2013 í Söngskólanum í Reykjavík undir handleiðslu Egils Árna Pálssonar og Önnu Rúnar Atladóttur. Einar hefur þrátt fyrir ungan aldur sungið hlutverk Gastone í La Traviata undir stjórn Garðars Cortes og sungið einsöng með Sinfóníuhljómsveit Íslands undir stjórn Rico Saccani.

Í ár er það hinn finnski Ville Matvejeff sem stjórnar tónleikunum en hann hefur á síðustu árum getið sér gott orð sem hljómsveitarstjóri, tónskáld og píanóleikari.

Matvejeff vinnur með sinfóníuhljómsveitum og í óperum og er listrænn stjórnandi Savonlinna óperuhátíðarinnar í Finnlandi og aðalhljómsveitarstjóri Norrland-óperuhljómsveitarinnar í Svíþjóð.
Inferno - Sinfóníuhljómsveit Íslands

Sinfóníuhjómsveit Íslands - Eldborg || 16. janúar 2025

Harpa - Eldborg
Inferno - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

16. jan. 2025 - fim. 19:30
Sinfóníuhljómsveit Íslands
Daníel Bjarnason
hljómsveitarstjóri
Vivi Vassileva
einleikari

Daníel Bjarnason
Inferno, slagverkskonsert

Daníel Bjarnason
A Fragile Hope

Pjotr Tsjajkovskíj
Francesca da Rimini

Daníel Bjarnason hefur átt farsælt samstarf við Sinfóníuhljómsveit Íslands í rúman áratug, bæði sem hljómsveitarstjóri og tónskáld. Hann var staðarlistamaður á árunum 2015—2018 og aðalgestastjórnandi árin 2019—2021, en starfar nú með sveitinni sem listamaður í samstarfi. Tónsmíðar Daníels hafa vakið mikla athygli víða um heim og fáum við á þessum tónleikum að hlýða á Íslandsfrumflutning á slagverkskonsertinum Inferno. Konsertinn var pantaður af Sinfóníuhljómsveitinni í Gautaborg, þar sem verkið var frumflutt árið 2023. Einleikari kvöldsins er slagverksstjarnan Vivi Vassileva sem hefur sérhæft sig í flutningi samtímatónlistar og kemur fram sem einleikari með helstu hljómsveitum víða um heim.

Eins og slagverkskonsertinn Inferno, sem vísar beint til vítisloga með nafni sínu, tengist seinni hluti efnisskrárinnar einnig undirdjúpum og undirheimum í ýmsum skilningi. Fyrst eftir hlé hljómar verk Daníels Bjarnasonar, A Fragile Hope, sem frumflutt var af Sinfóníuhljómsveitinni í Gautaborg í febrúar 2024. Daníel segir verk sitt sækja innblástur til Íslands, þar sem ótrúlegir kraftar búi undir yfirborðinu, jafnt í eldvirkni landsins sem og í hafinu í kring. Verkið er helgað minningu Jóhanns Jóhannssonar tónskálds sem lést 2018.

Lokaverk tónleikanna er eftir Pjotr Tsjajkovskíj. Francesca da Rimini var ítölsk aðalskona, fædd árið 1283, en samnefnt tónaljóð Tsjajkovskíjs rekur sorgarsögu hennar: Eiginmaður hennar myrti hana eftir að hann komst á snoðir um ástarsamband hennar við bróður hans. Innblásturinn að verkinu fékk Tsjajkovskíj þegar hann las Gleðileikinn guðdómlega eftir Dante Aligheri en þar birtist Francesca sem ein þeirra ólánssömu persóna sem Dante hittir í sjálfum hreinsunareldinum.
16. jan. 2025 - fim. 19:30
Sinfónían á Myrkum - Föstudagsröð Sinfóníuhljómsveitar Íslands

Sinfóníuhjómsveit Íslands - Norðurljós || 24. janúar 2025

Harpa - Eldborg
Sinfónían á Myrkum - Föstudagsröð Sinfóníuhljómsveitar Íslands

Áskrift - Regnbogakort Sinfóníuhljómsveitar Íslands 2024/25:

24. jan. 2025 - fös. 18:00
Sinfóníuhljómsveit Íslands
Daníel Bjarnason
hljómsveitarstjóri

Martin Kuuskmann
einleikari

Ingibjörg Ýr Skarphéðinsdóttir
Balaena

Marcos Balter
Orun

Páll Ragnar Pálsson
PLAY, fagottkonsert

Árlegir tónleikar Sinfóníuhljómsveitar Íslands á tónlistarhátíðinni Myrkum músíkdögum eru tilhlökkunarefni fyrir alla unnendur íslenskrar og alþjóðlegrar samtímatónlistar. Á tónleikunum, sem eru opnunartónleikar hátíðarinnar í ár, hljóma nýleg og athyglisverð verk frá Íslandi og Brasilíu. Tónleikarnir hefjast á verki Ingibjargar Ýrar Skarphéðinsdóttur, Balaena. Ingibjörg Ýr hefur á síðustu árum fest sig í sessi sem eitt áhugaverðasta tónskáld sinnar kynslóðar á Íslandi en hún útskrifaðist úr tónsmíðum frá Listaháskóla Íslands 2016. Verkið Balaena var frumflutt af Kammersveit Reykjavíkur á Myrkum músíkdögum 2023 og vakti þar mikla athygli en hljómar á þessum tónleikum í nýrri útgáfu fyrir fullskipaða sinfóníuhljómsveit.

Marcos Balter er eitt fremsta tónskáld Brasilíu um þessar mundir og sækir verk hans Orun frá 2022 innblástur í trúarlíf og hugleiðsluhefðir Yoruba-þjóðflokksins í Vestur-Afríku. Verkið kallar fram leiðslukennt andrúmsloft og nýtir sér hin fíngerðari blæbrigði hljómsveitarinnar til hins ítrasta. Það var frumflutt af Sinfóníuhljómsveit Nýja-heimsins í Flórída undir stjórn Matthiasar Pintscher haustið 2022 og hlaut fádæma góðar viðtökur.

Tónleikunum lýkur á Íslandsfrumflutningi á fagottkonserti Páls Ragnars Pálssonar, en Páll hefur verið í fremstu röð íslenskra tónskálda um árabil. Það var eistneski fagottvirtúósinn Martin Kuuskmann sem frumflutti verkið með Sinfóníuhljómsveit Eistlands undir stjórn Olari Elts árið 2022. Tengsl Páls Ragnars við Eistland eru djúpstæð, en hann stundaði tónsmíðanám þar og lauk doktorsprófi 2014. Í verkinu sækir Páll efnivið í ævi Kuuskmanns og sameiginlega hrifningu þeirra beggja á náttúru og menningu Eistlands. Tónleikarnir eru um klukkustundarlangir, án hlés.
24. jan. 2025 - fös. 18:00
Ari Þór og Osmo Vänskä - Sinfóníuhljómsveit Íslands

Sinfóníuhjómsveit Íslands - Eldborg ||30. janúar 2025

Harpa - Eldborg
Ari Þór og Osmo Vänskä - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

30. jan. 2025 - fim. 19:30
Sinfóníuhljómsveit Íslands
Osmo Vänskä
hljómsveitarstjóri

Ari Þór Vilhjálmsson
einleikari

Edward Elgar
In the South (Alassio)

Þórður Magnússon
Fiðlukonsert

Jennifer Higdon
Konsert fyrir hljómsveit

Finninn Osmo Vänskä er heiðursstjórnandi Sinfóníuhljómsveitar Íslands, en hann var aðalstjórnandi hennar frá 1993 - 1996, aðalgestastjórnandi hennar frá 2014—2019 og tíður gestur þess utan, enda samstarfið gjöfult og hefur hljómsveitin leikið marga ógleymanlega tónleika undir hans stjórn. Efnisskrá þessara tónleika er einstaklega litrík og glæsileg og er sérstakt ánægjuefni að Vänskä stjórni frumflutningi Ara Þórs Vilhjálmssonar fiðluleikara á nýjum fiðlukonserti Þórðar Magnússonar. Þórður hefur verið virkur í íslensku tónlistarlífi í áratugi og skapað sér sérstöðu með tónverkum sem fela í sér jafnt ferskan, nútímalegan andblæ og djúpa þekkingu á tónsmíðahefðum fortíðar. Hann hefur samið vel á fjórða tug stærri verka, bæði kammerverk og hljómsveitarverk og verður fiðlukonsertinn fimmta verkið sem Sinfóníuhljómsveit Íslands flytur eftir hann.

Fiðluleikarinn Ari Þór Vilhjálmsson lék með Sinfóníuhljómsveit Íslands á árunum 2006 til 2015 en kemur nú fram sem einleikari með hljómsveitinni í tíunda sinn. Hann starfaði lengi sem leiðari annarrar fiðlu í Fílharmóníusveit Helsinki en gegnir nú sömu stöðu hjá Fílharmóníusveit Ísraels í Tel Aviv.

Auk þess að koma fram sem einleikari hefur hann gegnt hlutverki gestakonsertmeistara í hljómsveitum á borð við Fílharmóníusveit Stokkhólms og Orchestre National du Capitole de Toulouse í Frakklandi.

Jennifer Higdon er eitt fremsta samtímatónskáld Bandaríkjanna. Verk hennar blue cathedral vakti mikla lukku á síðasta starfsári undir stjórn Stéphane Denéve. Á þessum tónleikum flytur sveitin verk hennar, Konsert fyrir hljómsveit, frá árinu 2002. Konsert er svo sannarlega réttnefni því leiðarar hljómsveitarinnar eru í einleikshlutverkum og eru gerðar miklar kröfur til þeirra. Konsertforleikinn In the South (Alassio) samdi Edward Elgar þegar hann var í fjölskyldufríi á Ítalíu. Hann ætlaði sér reyndar að semja hefðbundna sinfóníu en varð svo hugfanginn af andrúmsloftinu að hann samdi í staðinn þennan töfrandi forleik, sem er einskonar tónaljóð með ítölskum litum.
30. jan. 2025 - fim. 19:30
Eva stjórnar Mahler - Sinfóníuhljómsveit Íslands

Sinfóníuhjómsveit Íslands - Eldborg || 6. febrúar 2025

Harpa - Eldborg
Eva stjórnar Mahler - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

06. feb. 2025 - fim. 19:30
Sinfóníuhljómsveit Íslands
Eva Ollikainen
hljómsveitarstjóri

Anna Þorvaldsdóttir
ax

Gustav Mahler
Sinfónía nr. 9
Sinfónía nr. 9 eftir Gustav Mahler er stórvirki í öllum skilningi þess orðs. Hún tekur um 90 mínútur í flutningi og krefst stórrar sinfóníuhljómsveitar, enda spannar hún allt litróf hljómsveitarinnar. Í verkinu vinnur tónskáldið með stórar og miklar tilfinningar en þetta var síðasta sinfónían sem Mahler lauk við (þá tíundu skildi hann eftir í ókláruðu handriti). Sinfónían er óhefðbundin í þeim skilningi að hægu kaflarnir eru í upphafi og lokin og hefur fjórði og síðasti kaflinn verið túlkaður sem kveðja Mahlers til heimsins í kjölfar andláts Önnu Maríu dóttur hans og hjartveiki hans sjálfs. Hljómsveitarstjórinn Herbert von Karajan mun hafa sagt að tónlist níundu sinfóníunnar eigi uppruna sinn í öðrum heimi og komi úr eilífðinni.

Verk Önnu Þorvaldsdóttur, ax, er hljómsveitarverk sprottið úr tónverki hennar METAXIS, sem frumflutt var í alrými Hörpu í upphafi Listahátíðar vorið 2024, en METAXIS var samið fyrir „tvístraða hljómsveit og rými“ þar sem ómríkt fordyri Hörpu batt saman leik hljóðfærahópa sem léku hver í sínu horni. Nú hefur Anna eimað þetta verk niður í hljómsveitarverkið, ax, sem hægt er að njóta af sviði Eldborgar á hefðbundnum tónleikum, en galdur og hugmyndaauðgi þessa frábæra tónskálds eru þó ekki síður greinileg í hverjum takti.
06. feb. 2025 - fim. 19:30
Náttfatapartý Sinfóníunnar - Sinfóníuhljómsveit Íslands

Sinfóníuhjómsveit Íslands - Eldborg || 15. febrúar 2025

Harpa - Eldborg
Náttfatapartý Sinfóníunnar - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

15. feb. 2025 - lau. 14:00
Sinfóníuhljómsveit Íslands
Micah Gleason
hljómsveitarstjóri

Trúðurinn Barbara
kynnir

Sigrún Eðvaldsdóttir
Sigurður Flosason
einleikarar

Dansarar úr Listdansskóla Íslands

Wolfgang Amadeus Mozart
Eine kleine Nachtmusik (Allegro)

Veigar Margeirsson
Rætur: Kveðja — Sofðu unga ástin mín

Alexandre Desplat
Harry Potter og dauðadjásnin, svíta

Alan Menken
Arabískar nætur úr Aladdin

Komum okkur vel fyrir í náttfatapartýi Sinfóníunnar þar sem falleg næturtónlist og ljúfar vögguvísur hljóma. Hvað er unaðslegra en að lygna aftur augunum og svífa á vit drauma undir slíkri tónlist? Í öllum náttfatapartýjum þarf góða draugasögu, eitthvað til að halda fólki vakandi,allavega í smástund. Slíkir spennutónar slæðast með á þessum tónleikum, en einnig tónlist sem kveður niður allan draugagang svo sem titillag myndarinnar Ghostbusters sem fær alla móra og skottur sem leynast í Hörpu til að flýta sér í felur. Sigurður Flosason saxófónleikari vaggar okkur í svefn með laginu Sofðu unga ástin mín og Sigrún Eðvaldsdóttir fiðluleikari fer með okkur í seiðmagnað ferðalag til Austurlanda.

Við hvetjum tónleikagesti að sjálfsögðu til að mæta í náttfötum og með uppáhaldstuskudýrið í þetta skemmtilega náttfatapartý.
15. feb. 2025 - lau. 14:00
Rómantíska Sinfónían - Sinfóníuhljómsveit Íslands

Sinfóníuhjómsveit Íslands - Eldborg || 20. febrúar 2025

Harpa - Eldborg
Rómantíska Sinfónían - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

20. feb. 2025 - fim. 19:30
Sinfóníuhljómsveit Íslands
Eva Ollikainen
hljómsveitarstjóri

Katie Buckley
einleikari

Wolfgang Amadeus Mozart
Forleikurinn að Brottnáminu úr kvennabúrinu

Lotta Wennäkoski
Sigla, hörpukonsert

Anton Bruckner
Sinfónía nr. 4, „Rómantíska sinfónían“

Sinfóníur Antons Bruckner hafa verið nefndar dómkirkjur í tónum því þær eru bæði stórar að vexti og inntak þeirra djúpt og stórbrotið. Bruckner var lengi að finna sig sem tónskáld, var framan af fyrst og fremst organisti og hljómfræðikennari. Hann var strangtrúaður kaþólikki og samdi mikið af trúarlegri tónlist. Fjórða sinfónía Bruckners var lengi í smíðum og endurskrifaði hann stóran hluta hennar áður en hún var frumflutt árið 1881 við góðar undirtektir. Hann gaf sinfóníunni undirtitilinn hin rómantíska sem má túlka sem virðingarvott við þýsku rómantísku tónskáldin en í verkinu má finna enduróm allt frá Weber og Schumann til Wagners.

Katie Buckley hefur verið leiðandi hörpuleikari Sinfóníuhljómsveitar Íslands síðan 2006. Samhliða því hefur hún komið víða við í íslensku tónlistarlífi. Katie lýsir fyrstu kynnum sínum af verkinu svona: „Ég heillaðist algjörlega af þeirri útvíkkuðu tækni sem ég heyrði og hljómaði svo algjörlega sem hluti af náttúrulegum litum hörpunnar“.

Frægðarsól Wennäkoski hefur risið hratt á síðustu árum. Hún hefur samið hljómsveitarverk, óperur, kammertónlist og söngverk og er tónlist hennar reglulega flutt um allan heim. Konsertinn Sigla var frumfluttur og hljóðritaður árið 2022 af Sinfóníuhljómsveit finnska útvarpsins og hlaut sú hljóðritun verðlaun í flokki samtímatónlistar á verðlaunahátíð tímaritsins Gramophone ári síðar. Tónleikarnir hefjast á hinum léttleikandi forleik að Brottnáminu úr kvennabúrinu eftir Wolfgang Amadeus Mozart.
20. feb. 2025 - fim. 19:30
Víkingur leikur Brahms - 75 ára afmælistónleikar - Sinfóníuhljómsveit Íslands

Sinfóníuhjómsveit Íslands - Eldborg || 6. og 7. mars 2025

Harpa - Eldborg
Víkingur leikur Brahms - 75 ára afmælistónleikar - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

06. mar. 2025 - fim. 19:30

07. mar. 2025 - fös. 19:30
Sinfóníuhljómsveit Íslands
Eva Ollikainen
hljómsveitarstjóri

Víkingur Heiðar Ólafsson
einleikari

Kór Hallgrímskirkju
Steinar Logi Helgason
kórstjóri

Kór Langholtskirkju
Magnús Ragnarsson
kórstjóri

Ingibjörg Ýr Skarphéðinsdóttir
Hátíðarforleikur

Jón Leifs
Darraðarljóð

Johannes Brahms
Píanókonsert nr. 2

Richard Strauss
Ein Heldenleben

Í mars 2025 verða 75 ár liðin frá því Sinfóníuhljómsveit Íslands hélt sína fyrstu tónleika. Af því tilefni verður efnt til hátíðartónleika þar sem hljómsveitin leikur stórvirki úr tónlistarsögunni undir stjórn Evu Ollikainen, aðalhljómsveitarstjóra Sinfóníuhljómsveitar Íslands.

Víkingur Heiðar Ólafsson er einn af eftirsóttustu klassísku tónlistarmönnum heims um þessar mundir. Á þessu starfsári kemur hann fram með hljómsveitum á borð við Fílharmóníusveitir Berlínar, Lundúna og New York og frumflytur meðal annars nýjan píanókonsert John Adams með Sinfóníuhljómsveitinni í San Fransisco. Hann hefur hlotið fjölmörg alþjóðleg verðlaun fyrir leik sinn og hljóðritunum hans undir merkjum þýska útgáfufyrirtækisins Deutsche Gramophon hefur verið streymt yfir 900 milljón sinnum á helstu streymisveitum. Á þessum tónleikum tekst Víkingur á við annan píanókonsert Jóhannesar Brahms, stórbrotið glæsiverk sem spannar allt litrófið í leik einleikara og hljómsveitar — frá fíngerðri ljóðrænu til magnþrunginna tilfinninga.

Ein Heldenleben, eða Hetjulíf, er eitt þekktasta tónaljóð Richards Strauss. Verkið samdi Strauss þegar hann stóð á hátindi frægðar sinnar, var eftirsóttur hljómsveitarstjóri og hafði samið töluvert af verkum sem höfðu hlotið góðar viðtökur. Í Hetjulífi er tónskáldið sjálft söguhetjan, eins konar ofurmenni sem tekst á við mótlæti heimsins.

Tónleikarnir hefjast á nýjum hátíðarforleik Ingibjargar Ýrar Skarphéðinsdóttur, sem pantaður var af þessu tilefni. Hann er þó ekki eina verkið sem frumflutt verður á tónleikunum, en á þeim hljómar einnig í fyrsta sinn Darraðarljóð Jóns Leifs sem er skrifað fyrir kór og hljómsveit. Textann hefur Jón úr Brennu-Njáls sögu, nánar tiltekið hinum dulmagnaða nornasöng sem Dörruður verður vitni að í 157. kafla hennar. Í nótnahandritinu má sjá skrifað „samkvæmt 50 ára gamalli áætlun“ og er því ljóst að Jón hefur byrjað að huga að þessu viðfangsefni þegar á táningsaldri.
Suðræn veisla - Sinfóníuhljómsveit Íslands

Sinfóníuhjómsveit Íslands - Eldborg || 13. mars 2025

Harpa - Eldborg
Suðræn veisla - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

13. mar. 2025 - fim. 19:30
Sinfóníuhljómsveit Íslands
Juanjo Mena
hljómsveitarstjóri

Páll Palomares
einleikari

Louise Farrenc
Forleikur nr. 2

Édouard Lalo
Symphonie espagnole
„Spænska sinfónían“
Manuel de Falla
El sombrero de tres picos, svítur nr. 1 og 2

Einleikari þessara suðrænu og seiðandi tónleika er Páll Palomares, leiðari 2. fiðlu Sinfóníuhljómsveitar Íslands. Hann er einn af fremstu fiðluleikurum landsins, hefur haldið fjölda tónleika og leikið einleik með sinfóníuhljómsveitum víðsvegar um Evrópu. Það er vel við hæfi að Páll leiki Symphonie espagnole þar sem hann er fæddur á Spáni og bjó þar í barnæsku. Páll hefur jafnframt mjög persónulega tengingu við verkið. Hann segir: „Þetta er allra fyrsta verkið sem ég spilaði sem einleikari, en ég spilaði fyrsta kaflann með Sinfóníuhljómsveit í Murcia á Spáni 11 ára gamall. Maður gleymir aldrei fyrstu einleikstónleikunum sínum.“ Verkið leyfir einleikaranum að leika listir sínar og er sérlega áheyrilegt og skemmtilegt.

El sombrero de tres picos, eða Þriggja horna hatturinn, eftir Manuel de Falla var upphaflega ballett sem frumsýndur var í Lundúnum 1919. De Falla umritaði verkið síðar í þær tvær grípandi svítur sem hljóma á þessum tónleikum, en þær byggja mikið til á spænskum dönsum. Tónleikarnir hefjast á Forleik nr. 2 eftir franska tónskáldið Louise Farrenc. Ólíkt mörgum samtímakonum hennar á fyrri hluta 19. aldar átti Farrenc farsælan tónlistarferil og var bæði eftirsóttur píanóleikari og tónskáld, auk þess að gegna prófessorsstöðu við Parísarkonservatoríið. Þótt hún gæfi sig að flestum tónsmíðaformum samdi hún aldrei óperu. Segja má að Forleikur nr. 2 komist þó næst því — hann gefur hinum vinsælu óperusmíðum 19. aldarinnar í Frakklandi ekkert eftir í krafti, hugmyndaauðgi og sköpunargleði.
13. mar. 2025 - fim. 19:30
Arvo Pärt sinfóníur - Sinfóníuhljómsveit Íslands

Sinfóníuhjómsveit Íslands - Eldborg || 20. mars 2025

Harpa - Eldborg
Arvo Pärt sinfóníur - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

20. mar. 2025 - fim. 19:30
Sinfóníuhljómsveit Íslands
Eva Ollikainen
hljómsveitarstjóri

Arvo Pärt
Sinfóníur nr. 1, 2, 3 og 4.

Eistneska tónskáldið Arvo Pärt er meðal þekktustu núlifandi tónskálda heims og svo virðist sem kyrrðin, tærleikinn og hin allt að því dulræna andakt sem einkennir mörg verka hans eigi sérstakt erindi við nútímamanninn. Sá upphafni einfaldleiki sem verk Pärts búa yfir, og hefur verið nefndur helginaumhyggja, eða holy minimalism, er þó ekki eins einfaldur og hann sýnist. Hann byggir á áralangri leit og tilraunum með hugmyndafræði, form, tónmál og stíl.

Árið 2025 fagnar Arvo Pärt níræðisafmæli og af því tilefni flytur Sinfóníuhljómsveit Íslands allar fjórar sinfóníur hans á einum tónleikum, undir stjórn Evu Ollikainen aðalhljómsveitarstjóra. Sinfóníurnar verða jafnframt hljóðritaðar til útgáfu á vegum breska útgáfufyrirtækisins Chandos. Eins og tónskáldið sjálft hefur sagt er sérhver af sinfóníunum fjórum eins og heimur út af fyrir sig. Hér gefst einstakt tækifæri til að hlýða á þær í tímaröð — þær eru eins konar vörður á langri listrænni og andlegri vegferð tónskáldsins, en fjörutíu og fimm ár aðskilja þá fyrstu og þá fjórðu í tíma.
20. mar. 2025 - fim. 19:30
Herdís Anna og sellódeildin - Föstudagsröð SinfóníuhljómsveitarÍslands

Sinfóníuhjómsveit Íslands - Norðurljós || 21. mars 2025

Harpa - Norðurljós
Herdís Anna og sellódeildin - Föstudagsröð SinfóníuhljómsveitarÍslands

Áskrift - Regnbogakort Sinfóníuhljómsveitar Íslands 2024/25:

21. mar. 2025 - fös. 18:00
Sellódeild Sinfóníuhljómsveitar Íslands

Herdís Anna Jónasdóttir
einsöngvari

Á þessum tónleikum í Föstudagsröðinni sameina sellódeild Sinfóníuhljómsveitar Íslands og sópransöngkonan Herdís Anna Jónasdóttir krafta sína í heillandi og litríkri efnisskrá þar sem íslensk og suður-amerísk tónlist mætast. Verkin sem hljóma eru eftir Villa-Lobos, Þórð Magnússon, Astor Piazzolla, Magnús Blöndal Jóhannsson og fleiri. Herdís Anna Jónasdóttir sópran hefur um langt árabil verið ein af fremstu söngvurum landsins og hefur hún hlotið fjölda verðlauna fyrir list sína — til að mynda Íslensku tónlistarverðlaunin 2022 og Grímuverðlaunin 2019. Það er sérstakt tilhlökkunarefni að heyra bjarta og tæra rödd hennar mæta mjúkum og seiðandi hljóm sellósins, sem annars er allsráðandi á þessum skemmtilegu og fjölbreyttu tónleikum.
21. mar. 2025 - fös. 18:00
Prokofíev og Tsjajkovskíj - Sinfóníuhljómsveit Íslands

Sinfóníuhjómsveit Íslands - Eldborg || 27. mars 2025

Harpa - Eldborg
Prokofíev og Tsjajkovskíj - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

27. mar. 2025 - fim. 19:30
Sinfóníuhljómsveit Íslands
David Danzmayr
hljómsveitarstjóri

Claire Huangci
einleikari

Anna Clyne
This Midnight Hour

Sergei Prokofíev
Píanókonsert nr. 3

Pjotr Tsjajkovskíj
Sinfónía nr. 6, „Pathétique“

Það tók rússneska tónskáldið Sergei Prokofíev átta ár að ljúka við þriðja píanókonsert sinn, en tónskáldið frumflutti hann sjálfur í Chicago haustið 1921, enda mikill píanósnillingur. Ári síðar spilaði hann verkið undir stjórn landa síns Serge Koussevitzkyí í París og hefur það síðan verið álitið eitt af helstu píanóverkum 20. aldarinnar. Það er kínverskbandaríski píanóleikarinn Claire Huangci sem flytur okkur píanókonsertinn en hún kemur hér fram í annað skiptið með Sinfóníuhljómsveit Íslands. Tónleikar hennar árið 2023 þóttu ótrúlega vel heppnaðir og sagði gagnrýnandi Fréttablaðsins túlkun hennar á píanókonsert Ravels ferska, safaríka, spennuþrungna og áleitna.

Sjötta sinfónía rússneska tónskáldsins Pjotr Tsjajkovskíjs, einnig þekkt undir nafninu Pathétique, var hans síðasta tónverk en Tsjaíjkovskíj lést aðeins níu dögum eftir að hann stjórnaði frumflutningi verksins í Sankti Pétursborg haustið 1893. „Ég hef gefið alla sál mína í þessa sinfóníu,“ skrifaði tónskáldið um sinfóníuna, en hann taldi hana sitt besta verk. Verkið er ástríðuþrungið og tregafullt en í stað þess að átökum þess ljúki í sigurreifum fögnuði eins og títt var um sinfóníur nítjándu aldar lýkur því á einkar frumlegan og áhrifamikinn hátt; í hægum, djúpum harmi.

This Midnight Hour eftir breska tónskáldið Önnu Clyne, verður Íslandsfrumflutt á þessum tónleikum. Verkið er innblásið af ljóðunum La Musica eftir Juan Ramón Jimi og Harmonie du soir eftir Charles Baudelaire. Clyne segir um verkið: „Þó það innihaldi ekki neina ákveðna frásögn, er það von mín að það kalli fram sjónrænt ferðalag hjá hlustandanum.“
27. mar. 2025 - fim. 19:30
Óperuveisla með Ólafi Kjartani - Sinfóníuhljómsveit Íslands

Sinfóníuhjómsveit Íslands - Eldborg || 3. og 4. apríl 2025

Harpa - Eldborg
Óperuveisla með Ólafi Kjartani - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

03. apr. 2025 - fim. 19:30

04. apr. 2025 - fös. 19:30
Sinfóníuhljómsveit Íslands
Bjarni Frímann Bjarnason
hljómsveitarstjóri

Ólafur Kjartan Sigurðarson
Gunnar Björn Jónsson
Kristín Anna Guðmundsdóttir
Kristín Sveinsdóttir
einsöngvarar

Kór Langholtskirkju
Magnús Ragnarsson
kórstjóri

Ólafur Kjartan Sigurðarson, staðarlistamaður Sinfóníuhljómsveitar Íslands, hefur farið með himinskautum í heimi óperunnar á síðustu árum og sér ekki fyrir endann á sigurgöngu hans þar. Á undanförnum misserum hefur Ólafur komið fram í burðarhlutverkum á helstu sviðum óperuheimsins; í La Scala óperunni í Mílanó og á Wagnerhátíðinni í Bayreuth í Þýskalandi.

Hér býður Ólafur Kjartan til sannkallaðrar veislu — þetta er óperugala af bestu gerð þar sem glæsilegir gestir, söngvararnir Kristín Anna Guðmundsdóttir, Gunnar Björn Jónsson og Kristín Sveinsdóttir bregða sér í hin ýmsu hlutverk og syngja með Ólafi og Sinfóníuhljómsveit Íslands. Um tónsprotann heldur Bjarni Frímann Bjarnason.

Þessir tónleikar eru fullir af ástríðu, örlagaþrungnum aríum og dýrðlegum dúettum úr helstu perlum óperunnar, t.d. eftir Verdi, Puccini, Giordano og Bizet — ómissandi fyrir þá sem unna fögrum söng og óperutónlist.
Draumórasinfónían - Sinfóníuhljómsveit Íslands

Sinfóníuhjómsveit Íslands - Eldborg || 10. apríl 2025

Harpa - Eldborg
Draumórasinfónían - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

10. apr. 2025 - fim. 19:30
Sinfóníuhljómsveit Íslands
Bertrand de Billy
hljómsveitarstjóri

Rainer Honeck
einleikari

Arnold Schönberg
Næturljóð fyrir strengi og hörpu

Alban Berg
Fiðlukonsert

Hector Berlioz
Symphonie fantastique
„Draumórasinfónían“

Fiðlukonsert Albans Berg frá 1935 ber fræga tileinkun - hann er „helgaður minningu engils“. Engillinn var Manon Gropius, dóttir vinahjóna Bergs, þeirra Ölmu Mahler og Walters Gropius, sem lést úr mænusótt aðeins 18 ára gömul. Verkið er því einskonar sálumessa í konsertformi, en varð einnig síðasta verkið sem tónskáldið lauk við fyrir sitt eigið andlát. Þótt Berg hafi samið verkið með tólftónahætti stendur það föstum fótum í tónlistarhefð fyrri alda, í því heyrast bæði dúr- og mollþríhljómar og það geymir meðal annars vísanir í gamalt þjóðlag og kóral eftir Bach. Það er þannig bæði framsækið og hrífandi fagurt að hætti fyrri tíma.

Austurríski fiðluleikarinn Rainer Honeck leikur nú í Eldborg í annað sinn en árið 2017 stýrði hann Kammersveit Vínar og Berlínar úr sæti konsertmeistara og lék með þeim einleik. Gagnrýnendur áttu vart orð til þess að lýsa ánægju sinni með þessa tónleika og er það því mikið tilhlökkunarefni að fá hann til liðs við Sinfóníuhljómsveit Íslands.

Symphonie fantastique eða Draumórasinfónían eftir Hector Berlioz er eitt höfuðverka rómantíska tímabilsins og er bæði spennuþrungið og ævintýralegt. Undirtitill verksins er „Brot úr lífi listamanns“ og fjallar tónskáldið hér um eigið líf, óendurgoldna ást og óráðsdrauma. Þegar Symphonie fantastique var frumflutt fylgdi ítarleg umfjöllun um söguþráð verksins í efnisskrá tónleikanna, nokkuð sem var mikil nýbreytni á þeim tíma, en Berlioz hafi hafði tröllatrú á mætti hljóðfæratónlistar til þess að segja sögu.

Tónleikunum stjórnar franski hljómsveitarstjórinn Bertrand de Billy, fyrrum aðalgestastjórnandi Sinfóníuhljómsveitar Íslands.
10. apr. 2025 - fim. 19:30
Ungir einleikarar 2025 - Sinfóníuhljómsveit Íslands

Sinfóníuhljómsveit Íslands - Eldborg || 25. apríl 2025

Harpa - Eldborg
Ungir einleikarar 2025 - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

25. apr. 2025 - fös. 19:30
Sinfóníuhljómsveit Íslands
Mirian Khukhunaishvili
hljómsveitarstjóri
Einleikarar og efnisskrá kynnt síðar

Tónleikarnir Ungir einleikarar er sannkölluð uppskeruhátíð en þar koma fram þeir nemendur sem urðu hlutskarpastir í einleikara- og einsöngskeppni Sinfóníuhljómsveitar Íslands og Listaháskóla Íslands. Keppnin er opin öllum tónlistarnemendum á háskólastigi, óháð því hvaða skóla þeir sækja. Óhætt er að segja að þeir sem koma hér fram eru framtíð íslenskrar tónlistar og spennandi að fylgjast með þeim feta sín fyrstu skref í atvinnumennsku.

Hljómsveitarstjóri tónleikanna er hinn georgíski Mirian Khukhunaishvili, en hann lauk doktorsnámi í hljómsveitarstjórn frá Tónlistarakademíunni í Kraká í Póllandi árið 2020. Khukhunaishvili hefur á síðustu árum unnið hverja hljómsveitarstjórakeppnina á fætur annarri. Hann leggur mikla rækt við samvinnu við ungt fólk og er hann stofnandi og tónlistarstjóri Ungmennahljómsveitarinnar í Tbilisi og er kórstjóri kórs Listaháskóla Íslands, þar sem hann kennir jafnframt hljómsveitarstjórn.

Einstök stemming einkennir þessa tónleika og eftirvæntingin ávallt mikil þegar sigurvegararnir stíga á svið með Sinfóníuhljómsveit Íslands í Eldborg.

Nöfn sigurvegaranna verða birt á vef Sinfóníuhljómsveitarinnar að lokinni keppni í janúar.
25. apr. 2025 - fös. 19:30
Karnival dýranna - Sinfóníuhljómsveit Íslands

Sinfóníuhljómsveit Íslands || 10. maí 2025

Harpa - Eldborg
Karnival dýranna - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

10. maí 2025 - lau. 14:00
Sinfóníuhljómsveit Íslands
Kristian Sallinen
hljómsveitarstjóri

Jóhann Kristinsson
einsöngvari og kynnir

Rán Flygenring
teikningar
Þórarinn Eldjárn
ljóð

Wolfgang Amadeus Mozart
Tónaglens, 4. þáttur
Söngur fuglafangarans úr Töfraflautunni

Camille Saint-Saëns
Karnival dýranna

Það ríkir sannkölluð karnivalstemning á vortónleikum Litla tónsprotans þar sem glens og grín er leiðarstefið. Dagskráin hefst á sannkallaðri skemmtiferð í gegnum nokkur af glaðlegustu verkum Mozarts og endar í sjálfu Karnivali dýranna eftir Camille Saint-Saëns.

Það er Jóhann Kristinsson, söngvari og kynnir, sem bregður sér í fuglsgervi, syngur aríu Fuglafangarans úr Töfraflautunni og flytur smellin kvæði Þórarins Eldjárns við Karnival dýranna. Dýrin í Karnivalinu hafa verið heimilisvinir tónlistarunnenda um allan heim allt frá útgáfu þessa skemmtilega og litríka verks. Dýrin eiga öll sínar raddir sem hljóma frá ólíkum hljóðfærum hljómsveitarinnar og einkenni þeirra eru skýrt dregin fram á hnyttinn máta. Rán Flygenring situr á stóra sviðinu og teiknar dýrin stór og smá í Karnivalinu eftir því sem ævintýrinu vindur fram. Dýrin birtast því hlustendum ljóslifandi á stóra tjaldi Eldborgarsalar líkt og fyrir töfra undir dynjandi hljóðfæraslætti. Karnival dýranna, að undanskildum Svaninum, var ekki gefið út fyrr en eftir lát tónskáldsins þar sem Saint-Saëns þótti glettni og léttleiki verksins geta skaðað orðspor sitt sem tónskálds — verkið væri einfaldlega of skemmtilegt.
10. maí 2025 - lau. 14:00
Brahms og Tsjajkovskíj - Sinfóníuhljómsveit Íslands

Sinfóníuhjómsveit Íslands - Eldborg || 15. maí 2025

Harpa - Eldborg
Brahms og Tsjajkovskíj - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

15. maí 2025 - fim. 19:30
Sinfóníuhljómsveit Íslands
Andrew Manze
hljómsveitarstjóri

Dmytro Udovychenko
einleikari

Doreen Carwithen
ODTAA (One Damn Thing After Another)

Pjotr Tsjajkovskíj
Fiðlukonsert

Johannes Brahms
Sinfónía nr. 4

Úkranínski fiðluleikarinn Dmytro Udovychenko er einn af mest spennandi fiðluleikurum heims af yngri kynslóðinni, en hann hefur þegar unnið til fjölmargra verðlauna fyrir leik sinn og er á hraðri uppleið á stjörnuhimin klassíska tónlistarheimsins. Á þessum tónleikum leikur hann hinn óviðjafnanlega fiðlukonsert Pjotrs Tsjajkovskíj sem geymir ógleymanlegar laglínur og miklar ástríður, enda saminn á umbrotatíma í lífi tónskáldsins. Verkið samdi Tsjajkovskíj þegar hann dvaldi í Sviss í kjölfar skilnaðar og sjálfsvígstilraunar, en það var hrifning hans á ungum og afar færum fiðluleikara, Iosif Kotek að nafni, sem kveikti á ný neista sköpunarinnar með tónskáldinu. Konsertinn gerir óvenjumiklar kröfur til einleikarans, svo erfiðlega gekk að finna einleikara sem treysti sér til að frumflytja hann. Síðan þá hefur hann heldur betur fest sig í sessi sem einn helsti fiðlukonsert sögunnar og gefur einleikurum færi á að sýna hvað í þeim býr.

Þegar Johannes Brahms samdi sína fjórðu sinfóníu var hann á hátindi ferilsins og álitinn fremsta tónskáld Þýskalands. Sinfónían er ólík þeim sem á undan komu — þótt tónskáldinu gengi allt í haginn er hún myrkari og harmrænni, nokkuð sem rakið hefur verið til þess að Brahms hafði sökkt sér í lestur á harmleikjum Sófóklesar og vildi miðla anda gríska harmleiksins í tónum. Sinfónían er uppfull af andstæðum, geymir jafnt hlýju og nístandi sársauka og sameinar þau tvö ólíku aðalsmerki sem verk Brahms búa gjarnan yfir: vitsmunalega fágun og tilfinningalegan sprengikraft.

Doreen Carwithen var eitt fyrsta kvenkvikmyndatónskáld sögunnar og var sérlega eftirsótt sem slík um miðja síðustu öld. Líkt og önnur kventónskáld þess tíma mætti Carwithen miklum mótbyr vegna kyns síns og höfðu útgefendur ekki áhuga á efni hennar þrátt fyrir að það væri margverðlaunað. ODTAA var fyrsta hljómsveitarverk Carwithen og eru tónleikarnir einstakt tækifæri til þess að kynnast þessu áhugaverða tónskáldi.
15. maí 2025 - fim. 19:30
Britten, Saariaho og Sibelius - Sinfóníuhljómsveit Íslands

Sinfóníuhjómsveit Íslands - Eldborg || 30. maí 2025

Harpa - Eldborg
Britten, Saariaho og Sibelius - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

30. maí 2025 - fös. 19:30
Sinfóníuhljómsveit Íslands
Tabita Berglund
hljómsveitarstjóri

Ava Bahari
einleikari

Benjamin Britten
Four Sea Interludes, úr Peter Grimes
Benjamin Britten
Fiðlukonsert

Kaija Saariaho
Lumière et Pesanteur

Jean Sibelius
Sinfónía nr. 3

Hin sænska Ava Bahari leikur hér Fiðlukonsert Benjamins Britten sem er sívinsælt meistaraverk, uppfullt af tilfinningaþrunginni dramatík og leikandi lagrænu. Bahari er einn fremsti, ungi fiðluleikari Norðurlanda nú um stundir. Hún þreytti frumraun sína með Sinfóníuhljómsveit Gautaborgar aðeins 8 ára gömul en þar er hún einmitt staðarlistamaður á yfirstandandi starfsári. Hún hefur unnið til fjölda verðlauna fyrir fiðluleik sinn og kemur á næstunni fram sem einleikari með hljómsveitum á borð við Fílharmóníusveitir Lundúna og Helsinki, Sinfóníuhljómsveitina í Tokyo og BBC-þjóðarhljómsveitina í Wales en Bahari útskrifast í vor frá Hanns Eisler tónlistarháskólanum í Berlín.

Tónleikarnir hefjast á öðru verki eftir Britten, Four Sea Interludes, eða Fjórum sjávarmyndum, sem upphaflega voru leiknar milli atriða í óperu Brittens, Peter Grimes, frá 1945. Myndirnar leiða áheyrendur um staði og tíma í framvindu óperunnar, Jafnframt því að endurspegla tilfinningalega óreiðu söguhetjunnar.

Lumière et Pesanteur eftir Kaiju Saariaho er djúphugult og leiðslukennt verk sem býr yfir sterkri trúarlegri tengingu. Saariaho var eitt þekktasta samtímatónskáld Finna en hún lést árið 2023. Lokaverkið á efnisskránni er hins vegar hin stórglæsilega þriðja sinfónía Sibeliusar, sem segja má að umfaðmi áheyrendur með sinni þokkafullu og tæru nálgun á hið sinfóníska form. Það er Tabita Berglund sem heldur um tónsprotann á þessum tónleikum, en Berglund er ein af fremstu hljómsveitarstjórum Evrópu af yngri kynslóðinni.
30. maí 2025 - fös. 19:30
Tónlistarveisla með Barböru Hannigan - Sinfóníuhljómsveit Íslands

Sinfóníuhjómsveit Íslands - Eldborg || 5. júní 2025

Harpa - Eldborg
Tónlistarveisla með Barböru Hannigan - Sinfóníuhljómsveit Íslands

Áskrift - Regnbogakort Sinfóníuhljómsveitar Íslands 2024/25:

05. jún. 2025 - fim. 19:30
Sinfóníuhljómsveit Íslands
Barbara Hannigan
hljómsveitarstjóri og einsöngvari
Aaron Copland
Music for the Theatre

Joseph Haydn
Sinfónía nr. 90

Jacques Offenbach
Kaflar úr La Gaité Parisienne (úts.Rosenthal)

Kurt Weill
Youkali (úts. Bill Elliot)
Lost in the stars (úts. Bill Elliot)

Kanadíska söngkonan og hljómsveitarstjórinn Barbara Hannigan er einstakur listamaður sem starfað hefur með öllum helstu sinfóníuhljómsveitum og óperuhúsum heims og hefur frumflutt yfir 90 ný verk. Hún hefur hlotið margvísleg verðlaun fyrir list sína, meðal annars Grammy-verðlaun fyrir plötuna Crazy Girl Crazy árið 2018 og hin virtu Léonie Sonning-verðlaun árið 2020. Hannigan hefur þrisvar sinnum áður komið fram með Sinfóníuhljómsveit Íslands og í öll skipti hlotið mikið lof gagnrýnenda og áheyrenda.

Á þessum tónleikum býður Hannigan áheyrendum upp á efnisskrá þar sem gleði og húmor eru við stjórnvölinn. Tónleikarnir hefjast á Music for the Theatre eftir Aaron Copland þar sem jazzinn og lífskraftur millistríðsáranna leika lykilhlutverk. Joseph Haydn var einstaklega mikill húmoristi og hafði gaman af því að koma áheyrendum sínum á óvart. Óvíða fær skopskyn hans að njóta sín jafnvel og í Sinfóníu nr. 90. Þá leikur sveitin kafla úr ballettinum La Gaité Parisienne (Parísarfjör) eftir Jacques Offenbach og tónleikunum lýkur á tveimur ómótstæðilegum sönglögum Kurts Weill í flutningi Barböru Hannigan.

Barbara Hannigan kom fyrst fram með Sinfóníuhljómsveit Íslands á opnunartónleikum Listahátíðar árið 2022 þar sem hún sló heldur betur í gegn. Á tónleikum ári síðar hlaut Hannigan frábærar viðtökur og komst gagnrýnandi Fréttablaðsins svo að orði: „Hannigan söng og stjórnaði og dansaði og gerði það allt af yfirburðum. Söngurinn var fullur af krafti og ástríðu, en samt var röddin tær og fullkomlega mótuð. Hljómsveitin spilaði af gríðarlegu fjöri... Lokahnykkurinn var svo yfirgengilegur að áheyrendur spruttu á fætur og öskruðu.“ Tónleikar hennar í Reykjavík og á Akureyri með Himnasælusinfóníu Mahlers vorið 2023 vöktu sömuleiðis sterk, jákvæð viðbrögð, en hún kom síðast fram með Sinfóníuhljómsveit Íslands í apríl 2024, þar sem flutningur hennar á Mannsröddinni eftir Francis Poulenc þótti bera vott um gríðarlegt listfengi og fágun — og henni „var fagnað sem poppstjörnu“ (Mbl). Samstarf Hannigan og Sinfóníuhljómsveitar Íslands er þó aðeins rétt að hefjast en nýlega var tilkynnt að hún yrði næsti aðalhljómsveitarstjóri sveitarinnar. Tekur hún við því kefli haustið 2026.
05. jún. 2025 - fim. 19:30