Um viðburðinn

Hallveig Rúnarsdóttir er svo sannarlega búin að syngja sig inn í sál þjóðarinnar undanfarin ár  með sinni fögru sópranrödd og innlifun á sviði. Hallveig og Hrönn Þráinsdóttir píanóleikari hafa glatt marga áhorfendur hérlendis og erlendis með tónleikum sínum með faglegum flutningi og vönduðum efnisskrám. Á þessum tónleikum takast þær á við hin frægu Wesendonck ljóð Wagners. Á efnisskránni eru einnig kabarettlög eftir bandaríska tónskáldið William Bolcom og lög úr Brettl-Lieder (Kabarett söngvar) eftir austurríska tónskáldið Arnold Schönberg, sem geisla öll af kímni í frásögn og einfaldleika í tónlistinni. 

Flytjendur:

Hallveig Rúnarsdóttir, sópran
Hrönn Þráinsdóttir, píanó 

Syngjandi í Salnum er ný tónleikaröð sem hóf göngu sína í Salnum í Kópavogi í febrúar 2022. Listrænn stjórnandi hennar er Guðrún Jóhanna Ólafsdóttir söngkona. Í röðinni er boðið upp á söngtónleika með nokkrum af fremstu klassísku söngvurum Íslands. Hverjir tónleikar verða nokkurs konar ,,portrett“ tónleikar, sem gefa mynd af listamanninum. Á blandaðri efnisskránni er undirstöðuefnið oft íslenskur og erlendur ljóðasöngur ásamt óperuaríum. Tónleikaröðin býður upp á sjö tónleika yfir tónleikaárið 2022-2023.