Um viðburðinn

Naumhyggja, skjábjarmi, rytmi

Hið rómaða ítríó býður upp á ferska og kraftmikla efnisskrá þar sem víðfeðmur hljóðheimur harmonikkunnar nýtur sín til fullnustu. Ítríó er skipað þeim Helgu Kristbjörgu Guðmundsdóttur, Jóni Þorsteini Reynissyni og Jónasi Ásgeiri Ásgeirssyni en tríóið hefur komið fram á tónleikum og tónlistarhátíðum víða við frábærar undirtektir.

Hér hljóma nýleg verk í bland við eldri klassík en tríóið hefur lagt mikla rækt við nýsköpun allt frá því það var stofnað árið 2015. Dillandi balkandanstónar frá pólska harmonikkusnillingnum Janusz Wojtarowicz, hugleiðslukennd tónlist hins japanska Toshio Hosokawa, ómstríðir og ágengir tónar frá finnska tónskáldinu Jukka Tiensuu og dásamleg gotnesk svíta eftir Leos Boëllmann í bland við verk sem sérstaklega voru samin fyrir tríóið. Ljósbrot og skjábjarmi, keppnisskap í listum, prímtölur og stórkostlegar skrímslaborgir eru á meðal yrkisefna í tónsmíðum þeirra Finns Karlssonar, Friðriks Margrétar-Guðmundssonar og Hafdísar Bjarnadóttur.

Jukka Tiensuu: Mutta (1985)
Hafdís Bjarnadóttir: Monstro City
Toshio Howokawa: MI-KO
Friðrik Margrétar-Guðmundsson: Prisma
Finnur Karlsson: For All The Wrong Reasons
Leon Boellmann: Suite Gothique
Janusz Wojtarowicz: Balkan Dance

Á undan Tíbrártónleikum á sunnudaginn munu liðsmenn ítríós bregða ljósi á ferska og spennandi efnisskrá dagsins en þar verða meðal annars flutt þrjú spennandi íslensk verk, eftir Hafdísi Bjarnadóttur, Friðrik Margrétar-Guðmundsson og Finn Karlsson en Elísabet Indra Ragnarsdóttir stýrir spjallinu. Hægt verður að kaupa ljúffengar veitingar frá Krónikunni en ókeypis er á tónleikaspjallið og öll velkomin á meðan húsrúm leyfir.

Húsið verður opnað klukkan 12.

Tónleikaspjallið hefst klukkan 12:30.

Tónleikar ítrós, skipað Helgu Kristbjörgu Guðmundsdóttur, Jóni Þorsteini Reynissyni og Jónasi Ásgeir Ásgeirssyni, hefjast klukkan 13:30.