Tix.is

Norræna Húsið

  • 21. okt. - Kl. 20:00
Miðaverð:2.000 - 3.000 kr.
Um viðburðinn

Þórir Jóhannsson, kontrabassaleikari og Ingunn Hildur Hauksdóttir, píanóleikari flytja tónlist eftir Zoltán Kodály, Giovanni Bottesini, Max Bruch, Árna Egilsson, Karólínu Eiríksdóttur og Þórð Magnússon. Kontrabassinn hefur sótt í sig veðrið sem einleikshljóðfæri undanfarna áratugi en verður að teljast frekar óþekkt í íslenskri tónlistarflóru. Ingunn og Þórir bæta úr því en samstarf þeirra hófst árið 2012 þegar þeim var boðið að spila á alþjóðlegri ráðstefnu kontrabassaleikara í Kaupmannahöfn.

Þórir Jóhannsson lauk Postgraduate Diploma frá the Royal Northern College of Music í Manchester og dvaldi í nokkur ár í Danmörku að námi loknu, þar sem hann var lausráðinn við nokkrar helstu hljómsveitir beggja vegna Eyrarsunds. Hann flutti heim til Íslands haustið 2000 og er nú fastráðinn við Sinfóníuhljómsveit Íslands. Hann kennir við Tónlistarskóla Kópavogs og hefur reglulega komið fram með kvintett á tónleikum hins virta Kammermúsikklúbbs. Þórir hefur frumflutt y´mis verk fyrir kontrabassa, “Rhapsodia per Contrabasso et Piano” eftir Þórð Magnússon frumflutti hann 2011 og er verkið að finna á hljómdiskinum “La Poesie” sem kom út árið 2013.

Ingunn Hildur Hauksdóttir stundaði fyrst píanónám við Tónlistarskóla Hafnarfjarðar og lauk síðar píanókennara- og einleikaraprófi frá Tónlistarskólanum í Reykjavík. Hún sótti einkatíma hjá Roger Vignoles um tveggja ára skeið og einnig hefur hún sótt fjölmörg námskeið, m.a. hjá Dalton Baldwin, Nelita True og György Sebök. Hún er virk í kammertónlist með tónlistarhópum á borð við Camerarctica og Notus-tríó og hefur farið í tónleikaferðir til Bretlands, Ítalíu og Spánar með þeim síðarnefnda. Hún hefur leikið á upptökum fyrir útvarp og geisladiska og komið fram á fjölmörgum tónleikum innanlands sem utan. Síðastliðin ár hefur hún leikið reglulega á tónleikum Kammermúsíkklúbbsins. Ingunn kennir píanóleik við Tónlistarskóla Kópavogs og Tónlistarskóla Garðabæjar og starfar sem meðleikari við Menntaskólann í Tónlist.

Miðar fást á tix.is og við innganginn. Aðgangseyrir er kr. 3.000, 2.000 kr. fyrir eldri borgara og öryrkja, ókeypis fyrir nemendur og gesti 20 ára og yngri. Klassík í Vatnsmýrinni er tónleikaröð Félags íslenskra tónlistarmanna – klassískrar deildar FÍH í samvinnu við Norræna húsið og leggur áherslu á norrænt og alþjóðlegt samstarf.

www.nordichouse.is