Barokkbandið
Brák er skipað hópi fólks sem hefur
sérhæft sig að hluta í upprunaflutningi í námi erlendis og vill nýta þessa
þekkingu sína til tónleikahalds og verkefna á Íslandi.
Sveitin hefur upp á
síðkastið fengið til liðs við sig jafnt íslenska og erlenda hljóðfæraleikara,
söngvara og dansara til að glæða nýju lífi í tónlist barokk og
endurreisnartímans.
Hefur Brák hlotið mikið lof hvarvetna á síðustu misserum.
Þá hafa þónokkrir tónleikar bandsins verið hljóðritaðir og útvarpaðir af
Ríkisútvarpinu og hafa gagnrýnendur Morgunblaðsins og Fréttablaðsins lofað Brák
fyrir líflegt og vandað tónleikahald og gefið tónleikum hópsins fjórar og
fjórar og hálfa stjörnu í dómum sínum. Barokkbandið Brák hefur í tvígang verið
tilnefnt til Íslensku Tónlistarverðlaunanna sem Tónlistarflytjandi Ársins 2017
og 2018 en bandið fékk einnig tilnefningu fyrir Tónlistarviðburð Ársins 2018.
Frumkvöðlar
úr fortíð og nútíð
Barokkbandið Brák snýr aftur á Sígilda
Sunnudaga með tvennum spennandi tónleikum á vorönn 2020. Á þessum fyrri tónleikum
fær að hljóma nýtt verk eftir Hlyn A. Vilmars sem pantað var sérstaklega af
Barokkbandinu Brák. Að auki verða leikin strengjasinfónía eftir Carl Philipp
Emanuel Bach, Tvöfaldur konsert fyrir fiðlu og sembal eftir Joseph Haydn og
kammerverk eftir Johann Friederich Fasch. Elfa Rún Kristinsdóttir mun leika
einleik í konserti Haydns ásamt sérstökum gesti Brákar, ítalska
semballeikaranum Francesco Corti.
Allt áhugafólk um vandaðan upprunaflutning og nýja tónlist ættu ekki að láta þessa tónleika framhjá sér fara.