Um viðburðinn

Um þessar mundir erum við mörg hver að kanna algjörlega nýtt starfsumhverfi þar sem ekki er hægt að taka á móti fólki í raunheimum í hvers kyns hópiðkun. Þú getur því iðkað heima hjá þér eða á dvalarstað þínum. Þessi tími verður 60 mínútna yoga nidra í lifandi streymi á netinu. Þú færð hlekk sendan í tölvupósti samdægurs og getur svo endurspilað tímann í 24 klst eftir að hann fer fram. 

Yoga nidra er liggjandi leidd hugleiðsla og djúpslökun og þú þarft ekkert að gera nema að liggja, hlusta og njóta hvíldar. Best er að vera á stað þar sem þú verður ekki fyrir truflun og búa vel um þig með teppi og púða. Líkamshitinn lækkar töluvert í svona djúpri slökun og því gott að vera hlýtt. 100% hreinn kakóbolli á undan setur svo punktinn yfir i-ið en djúpslökun og hreint kakó draga úr kortisólmyndun í líkamanum en það er streituhormón líkamans. Ef þú hefur áhuga á að kaupa kakó getur þú gert það hér. 

Með iðkun yoga nidra er hægt að ná mjög djúpri slökun með fullri vitund, á dásamlegum stað á milli svefns og vöku þar sem líkaminn hvílist á meðan undirmeðvitundin er leidd í djúpt slökunarástand handan skilningarvitanna þar sem engin streita býr og fullkomin eining ríkir. Yoga nidra getur losað um líkamlega, andlega og tilfinningalega spennu en einn klukkutími af yoga nidra veitir hvíld á við fjögurra tíma svefn. Yoga nidra hefur meðal annars reynst vel í að draga úr streitu og bæta svefn.

Yoga nidra leiðir Kamilla Ingibergsdóttir yogakennari og tónheilari en hún hefur stundað yoga og hugleiðslu um árabil og kakó hefur reynst henni dásamlegur hjálpari í gegnum ýmis verkefni í lífinu. Hér má lesa meira um Kamillu og hér nánar um kakó eða svokallað ceremonial cacao.