Um viðburðinn

Samkomubann hefur verið sett á hérlendis vegna kórónuveirunnar og tekur það gildi aðfaranótt mánudags. Í ljósi þessa hefur Sinfóníuhljómsveit Íslands einnig ákveðið að aflýsa tvennum fjölmennum fjölskyldutónleikum í Eldborg laugardaginn 14. mars. Athugið að miðahafar geta fært aðgöngumiða sína á aðra tónleika hljómsveitarinnar síðar á þessu starfsári, henti það ekki er hægt að fá miðann endurgreiddan í miðasölu Hörpu. Nánar hér: https://www.sinfonia.is/frettir/tilkynning-vegna-samkomubanns.

LITLI TÓNSPROTINN
Dimmalimm og Svanavatnið – Sinfóníuhljómsveit Íslands
Atli Heimir Sveinsson: Dimmalimm
Pjotr Tsjajkovskíj: Úr Svanavatninu
Atli Heimir Sveinsson: Kvæðið um fuglana

Bjarni Frímann Bjarnason hljómsveitarstjóri
Trúðurinn Barbara sögumaður og kynnir
Nemendur úr Listdansskóla Íslands
Gradualekór Langholtskirkju

Listmálarinn Muggur, Guðmundur Thorsteinsson, samdi ævintýrið um Dimmalimm árið 1921 handa lítilli frænku sinni þegar hann var á siglingu á Miðjarðarhafinu. Ævintýrið er meðal helstu gersema listamálarans og hann málaði gullfallegar myndir með sögunni sem tónleikagestir njóta meðan á flutningi tónlistarinnar stendur. Tónlist Atla Heimis Sveinssonar við verkið skipaði sér strax í flokk helstu djásna íslenskra tónverka. Nú verður það flutt af Sinfóníuhljómsveit Íslands ásamt kórstúlkum úr Gradualekór Langholtskirkju og dönsurum úr Listdansskóla Íslands.

Það er við hæfi á þessum ljúfu og fallegu tónleikum að fylgja Dimmalimm úr hlaði með völdum þáttum úr Svanavatninu eftir Tsjajkovskíj. Rússneski dansinn, Dans litlu svananna og fleiri þættir munu gleðja tónleikagesti í túlkun nemenda Listdansskóla Íslands. Þessum sannkölluðu ævintýratónleikum lýkur á Kvæðinu um fuglana eftir Atla Heimi Sveinsson.

Kynnir og sögumaður tónleikanna er trúðurinn Barbara, leikinn af Halldóru Geirharðsdóttur, og hljómsveitarstjóri er Bjarni Frímann Bjarnason.