Um viðburðinn

Árið 1998 kom út fyrsta plata þá óþekktrar hljómsveitar að nafni Ensími. Platan fékk heitið Kafbátamúsík og varð fljótlega mjög áberandi í íslensku tónlistarlífi. Lögin Gaur, Arpeggiator og Atari urðu vinsæl á öldum ljósvaka, en það síðastnefnda var valið lag árins á Íslensku tónlistarverðlaununum og hljómsveitin valin „Nýliði ársins“.

Kafbátamúsík er talin ein af bestu plötum Íslandssögunnar samkvæmt stórri könnun Ràsar 2 hér um árið.

Kafbátamúsík hefur lifað góðu lífi en verið ófáanleg í geisladiskaformi (cd) í mörg ár. Það er því gleðiefni að nú sé hún fáanleg á vínylformi á öllum helstu sölustöðum sem selja plötur.

Í tilefni 20 ára útgáfuafmælisins mun Ensími leika Kafbátamúsík í heild sinni á Græna hattinum 16. mars. Einnig mun sveitin leika vel valin lög af farsælum útgáfuferli sveitarinnar og jafnvel frumflytja ný lög af væntanlegri breiðskífu.