Um viðburðinn

Óperudagar kynna:

Ástríður Alda Sigurðardóttir píanóleikari og Bjarni Thor Kristinsson bassasöngvari kíkja í gamlar tónleikaskrár og setja saman efnisskrá úr vel völdum aríum og lögum sem þau hafa áður flutt á tónleikum.

Ástríður hefur komið víða fram á tónleikum, ýmist sem einleikari eða með öðrum tónlistarmönnum. Þá hefur hún komið fram sem einleikari með Internationales Jugendsinfonie-orchester Elbe-Weser í Þýskalandi, með Sinfóníuhljómsveit Íslands og með Sinfóníuhljómsveit áhugamanna.

Bjarna Thor þarf vart að kynna fyrir íslenskum tónlistarunnendum en hann hefur átt mikilli velgengni að fagna á erlendum óperusviðum. Hann hóf söngferil sinn í Vín og eftir að hafa starfað þar fastráðinn, syngur hann í lausamennsku við mörg stærstu óperuhús Evrópu, m.a. Berlín, París, Feneyjar, Verona, Róm, Lissabon, Barcelona, Amsterdam, Hamborg og München.

Eftir tónleikana gefst tónleikagestum kostur á að hlýða á stutt spjall við Bjarna þar sem fulltrúi Óperudaga forvitnast um nýjasta ævintýri hans í Kassel og hægt verður að spyrja hann spjörunum úr.