The Lover er sjónrænt dansverk, hugleiðing um samband manns og náttúru. Fjallað er um tengslin milli tilvistar, híbýla og aðstæðna mannverunnar í eilífðar samhengi. Hvernig maðurinn og jörðin bæði skapa og eyða. Hvernig manneskjan býr í náttúrunni og hvernig náttúran býr í mannskepnunni.
Líkami Báru og umhverfi hans eru í stöðugri þróun og umbreytingu á meðan á sýningunni stendur. Í verkinu er áhorfendum boðið í rými til íhugunar; hvað er mennskt, hvað er dýrslegt, hvað er náttúrulegt, hvað er af mannavöldum, hvað er lífrænt...
Bára hefur í gegnum árin þróað einstakan hreyfistíl sem hún nýtir til þess að miðla hugmyndum og tilvísunum í gegnum dansformið. Með ólíkum nálgunum á viðfangsefnum sínum leitast hún við að mynda hugrenningartengsl á milli spurninga samtímans við eilífðina. Verk hennar eiga það sameiginlegt að endurspegla spurningar um tilvist mannsins og samfélagsins sem við búum í.
Verkið var upphaflega frumsýnt á tvíæringnum PERFORMATIK í Beursschouwburg Brussel árið 2015 og hefur síðan þá farið víða.
Dansari og danshöfundur: Bára Sigfúsdóttir
Ljósmyndari: Noémie Goudal
Sviðsmynd: Noémie Goudal í samstarfi við 88888
Arkitekt: Jeroen Verrecht
Tónlist og hljóð: Borko
Lýsing og tækni: Kris Van Oudenhove
Dramatúrg: Sara Vanderieck