Norræna húsið býður fjölskyldur velkomin á skemmtilega textílvinnusmiðju með áherslu á sjáfbærni og sköpun. Vinnusmiðjan er liður í Umhverfishátíð Norræna hússins sem er haldin dagana 7. – 8. apríl.
Þátttaka er ókeypis. Einn miði gildir fyrir 1 þátttakanda, fullorðin eða barn. Fullorðin getur fylgt 1 eða 2 börnum. Vinnusmiðjan er á íslensku.
Þátttakendur fá tækifæri til að skapa sína eigin furðuveru sem er gerð úr endurunnum textílefnum sem féllu til við framleiðslu á Íslandi. Efnin sem við notum koma frá Umemi, Glófa og Cintamani. Allir eru hvattir til að segja söguna af furðuverunni og leyfa öðrum að kynnast henni betur.
Leiðbeinendur í smiðjunni eru þær Erla Dís Arnardóttir textílhönnuður og kennari og Guðný Katrín Einarsdóttir textílhönnuður og iðjuþjálfi. Leiðbeinendurnir standa fyrir verkefninu Handaband. Handaband er þróunarverkefni sem hóf göngu sína í mars 2017 á Vitatorgi, félagsmiðstöð og samfélagshúsi Reykjavíkurborgar. Markmið verkefnisins var að þróa nýjan valkost, skapandi vinnustofu, sem hluta af félagsstarfinu.
- - -
Helgina 7-8. apríl mun fjölbreytt umhverfisdagskrá fyrir gesti á öllum aldri fylla Norræna húsið. Markmiðið er að kynna einfaldar og skemmtilegar lausnir sem stuðla að grænna heimili. Þátttaka er ókeypis og allir eru velkomnir meðan húsrúm leyfir.