SÓNÖTUR OG LJÓÐRÆN SMÁLÖG
Bryndís
Halla Gylfadóttir sellóleikari og Edda Erlendsdóttir píanóleikari hafa um
árabil verið í fremstu röð íslenskra hljóðfæraleikara bæði sem einleikarar og í kammertónlist. Þær eiga
að baki langt og farsælt samstarf sem hófst á Kammertónleikum á
Kirkjubæjarklaustri.
Geisladiskur
þeirra með verkum eftir Kodaly, Martinu, Enescu og Janacek hlaut einróma lof
gagnrýnenda bæði á Íslandi og í Frakklandi og
fékk Íslensku Tónlistarverðlaunin árið 2004.
Þær munu hér flytja verk fyrir selló og píanó sem spanna
breitt tímabil en eiga það sameiginlegt að vera ljóðræn.
Efnisskrá
Sónata fyrir selló og píanó eftir Þórð Magnússon var
upprunalega pöntuð af japanska píanóleikaranum Izumi Tateno og þá fyrir selló
og vinstri handar píanó. Verkið var frumflutt í þeirri mynd á tónleikum
í Tokyo af Izumi og Bryndísi Höllu Gylfadóttur.
Verkið skiptist í 5 þætti sem byggja mjög lítið á hinu
staðlaða sónötuformi klassíska tímans. Í rauninni fylgir tónskáldið
frekar þeirri hugmynd að skilgreiningin á sónötu sé hvað svo sem tónskáldinu
dettur í hug að setja á blað.
Fyrsti kaflinn er hægur og draumkenndur, annar kaflinn dans,
sá þriðji er dimmur, fjórði dyntóttur og sá fimmti dularfullur.
Tónskáldið umritaði verkið fyrir selló og tveggja handa
píanó árið 2017.
Sónata fyrir selló og píanó eftir Frank Bridge samin árið1917 er afar rómantísk og þykir mörgum þar gæta áhrifa frá Rachmaninoff. Bridge varð ungur fyrir miklum áhrifum af Brahms og póst- rómantíska skólanum sem heyrist vel í þessu verki.
Ungverska tónskáldið Franz Liszt sem er helst þekktur fyrir píanóverk sín samdi alls 82 sönglög. Hann umritaði nokkur þeirra fyrir önnur hljóðfæri og gefst hér tækifæri til að heyra 3 verk sem hann umritaði fyrir selló og píanó.
Þegar Johannes Brahms dvaldi árið 1886 sumarlangt við vatnið Thoun í svissnesku Ölpunum, gaf stórkostleg náttúran honum innblástur til að semja nokkur af sínum alfallegustu sönglögum og kammerverkum þar á meðal Sónötu nr.2 fyrir selló og píanó.